Ekspertlar ta’kidlashicha, Rossiya prezidenti Vladimir Putinga yaqin bo‘lgan elita a’zolari va yuqori mansabli amaldorlar “sarosimaga tushib qolgan” va Ukrainadagi urushga nuqta qo‘yish uchun muzokaralarni boshlashni istamoqda, deb yozadi Britaniyaning Mirror nashri.
14-avgust kuni kechqurun Kremlning yuqori mansabli amaldori G‘arbga murojaat qilib, Ukrainadagi urushni to‘xtatishda yordam so‘ragani ma’lum qilindi.
Vladimir Putin atrofidagi elita a’zolaridan biri anonim tarzda Kreml sarosimada ekani va urushni to‘xtatishga ehtiyojmandligini ma’lum qilgan. Bu haqda G‘arb maxsus xizmatlari orasida tarqalgan hisobotda aytiladi.
Putinga yaqin katta ofitserlar va amaldorlar urush keltirib chiqargan G‘arb sanksiyalari va iqtisodiyotning qulashidan xavotirda, deb hisoblaniladi.
Shuningdek, Kremlning ba’zi amaldorlari Ukrainaning Zaporojye AESdagi jangovar harakatlar kabi tobora xavotirli risklardan tashvishga tushmoqda.
The Daily Mirror qayd etishicha, “vaziyat haqidagi hisobot” maxsus xizmatlar tomonidan jiddiy qabul qilinmoqda. Hujjatda: “Putinning yaqin doirasi vakili G‘arbga muzokaralar o‘tkazish haqida signal yubordi. Kreml elitasi sarosimali kayfiyatda”, — deyiladi.
Bu qadam Putindan yashirincha amalga oshirilgani taxmin qilinmoqda.
Insayder anonim qoldirilgan, agar uning ismi oshkor qilinsa, o‘zi ham, oilasi ham katta xavf ostida qolardi, Putin esa harbiy boshliqlar va yuqori mansabli josuslarni ishdan bo‘shatib, bir necha marta tozalashlar o‘tkazgan, deyiladi xabarda.
“Agar Putinga yaqin odamlardan biri allaqachon shunday taklif bilan chiqqan bo‘lganida ham bu kutilmagan yangilik bo‘lmasdi, — dedi Daily Mirror’ning ukrainalik diplomat manbasi. — Bunday holat tez-tez sodir bo‘ladi, masalan, Ikkinchi jahon urushining yakuniy bosqichlarida rasmiy shaxslar o‘z kelajagidan xavotir olib, uni ta’minlash uchun qadamlar qo‘ygan. Kreml elitasining ko‘pchiligi G‘arbdagi hayotni yaxshi biladi, farzandlari G‘arb universitetlarida o‘qiydi, o‘sha yerlarda yashaydi. Ular biladiki, Putin hokimiyatidan uzoqda yaxshi hayot kechirish mumkin, ammo hozircha buning uchun hech narsa qilgani yo‘q, chunki o‘zlariga nima bo‘lishi mumkinligidan juda qattiq qo‘rquvda”.
Izoh (0)