Экспертлар таъкидлашича, Россия президенти Владимир Путинга яқин бўлган элита аъзолари ва юқори мансабли амалдорлар «саросимага тушиб қолган» ва Украинадаги урушга нуқта қўйиш учун музокараларни бошлашни истамоқда, деб ёзади Британиянинг Mirror нашри.
14 август куни кечқурун Кремлнинг юқори мансабли амалдори Ғарбга мурожаат қилиб, Украинадаги урушни тўхтатишда ёрдам сўрагани маълум қилинди.
Владимир Путин атрофидаги элита аъзоларидан бири аноним тарзда Кремль саросимада экани ва урушни тўхтатишга эҳтиёжмандлигини маълум қилган. Бу ҳақда Ғарб махсус хизматлари орасида тарқалган ҳисоботда айтилади.
Путинга яқин катта офицерлар ва амалдорлар уруш келтириб чиқарган Ғарб санкциялари ва иқтисодиётнинг қулашидан хавотирда, деб ҳисобланилади.
Шунингдек, Кремлнинг баъзи амалдорлари Украинанинг Запорожье АЭСдаги жанговар ҳаракатлар каби тобора хавотирли рисклардан ташвишга тушмоқда.
The Daily Mirror қайд этишича, «вазият ҳақидаги ҳисобот» махсус хизматлар томонидан жиддий қабул қилинмоқда. Ҳужжатда: «Путиннинг яқин доираси вакили Ғарбга музокаралар ўтказиш ҳақида сигнал юборди. Кремль элитаси саросимали кайфиятда», — дейилади.
Бу қадам Путиндан яширинча амалга оширилгани тахмин қилинмоқда.
Инсайдер аноним қолдирилган, агар унинг исми ошкор қилинса, ўзи ҳам, оиласи ҳам катта хавф остида қоларди, Путин эса ҳарбий бошлиқлар ва юқори мансабли жосусларни ишдан бўшатиб, бир неча марта тозалашлар ўтказган, дейилади хабарда.
«Агар Путинга яқин одамлардан бири аллақачон шундай таклиф билан чиққан бўлганида ҳам бу кутилмаган янгилик бўлмасди, — деди Daily Mirror’нинг украиналик дипломат манбаси. — Бундай ҳолат тез-тез содир бўлади, масалан, Иккинчи жаҳон урушининг якуний босқичларида расмий шахслар ўз келажагидан хавотир олиб, уни таъминлаш учун қадамлар қўйган. Кремль элитасининг кўпчилиги Ғарбдаги ҳаётни яхши билади, фарзандлари Ғарб университетларида ўқийди, ўша ерларда яшайди. Улар биладики, Путин ҳокимиятидан узоқда яхши ҳаёт кечириш мумкин, аммо ҳозирча бунинг учун ҳеч нарса қилгани йўқ, чунки ўзларига нима бўлиши мумкинлигидан жуда қаттиқ қўрқувда».
Изоҳ (0)