Britaniyaning radiotexnik razvedka va radioelektron kurash bo‘yicha RC-135 samolyoti Rossiya davlat chegarasini buzib kirdi. Bu haqda Rossiya Mudofaa vazirligi ma’lum qildi, deb yozadi Meduza.
Hodisa Barens dengizi va Oq dengizni ajratib turuvchi Kola yarim orolining sharqiy qirg‘og‘idagi Svyatoy nos burni yaqinida sodir bo‘lgan.
“Davlat chegarasining buzilishi oldini olish uchun Havo hujumiga qarshi mudofaa kuchlari bo‘yicha navbatchilar tarkibidan MiG-31BM qiruvchi samolyoti safarbar qilindi”, — deya ma’lum qildi Mudofaa vazirligi.
Rossiya qiruvchisi Britaniya razvedkachi samolyotini Rossiya hududidan tashqariga “siqib chiqardi”, deya qo‘shib qo‘ydi vazirlik.
2021-yil iyunida Rossiya Mudofaa vazirligi Britaniyaning “Defender” esminetsi Qrimdagi Fiolent burni yaqinida Rossiya chegarasini buzganini ma’lum qilgandi. Esminets yo‘nalishida ogohlantiruvchi o‘t ochilgan va “ogohlantirish sifatida bomba tashlangan”, shundan keyin u Rossiya hududiy suvlarini tark etgan. Buyuk Britaniya esa kema Rossiya chegarasini buzgani va unga qarata bombalar tashlanganini rad etgandi.
Izoh (0)