Armanistonda savdo markazidagi portlash qurbonlari soni 15 kishiga yetdi

Armaniston poytaxti Yerevandagi “Surmalu” savdo markazida yuz bergan yong‘in oqibatida kamida 15 kishi halok bo‘lib, yana 60 kishi jabrlandi, deb yozadi “RBK” mamlakat FVVga tayanib.

Bedarak yo‘qolganlar soni 18 kishiga yetdi, avvalroq 17 kishi deb aytilgandi. Ammo mahalliy OAVlar aniqlik kiritishicha, bungacha 20 kishi bedarak yo‘qolgan edi, endi esa ularning soni qisqargan.

To‘qqiz nafar qurbon, shu jumladan, bir yosh bolaning shaxsi aniqlanganicha yo‘q.

60 jabrlanuvchining 12 nafari kasalxonalarda qolib, davolanmoqda, qolgan 48 kishi uyiga yuborilgan.

“16-avgust 5:19 (Toshkent vaqti bilan 6:19) holatiga yong‘inni o‘chirish va qidiruv-qutqaruv ishlari davom etmoqda”, — deya qayd etishdi FVVda.

Yerevan savdo markazidagi portlash 14-avgust kuni sodir bo‘ldi. “Novosti-Armeniya” mushaklar (feyerverklar) saqlanadigan ombor yonib ketganini ma’lum qildi. Yong‘inga murakkablik bo‘yicha uchinchi daraja berildi. 14-avgust kuni kechqurun Armaniston FVV matbuot kotibi 61 kishi jabrlanganini xabar qildi.

Mamlakat bosh prokuraturasi oson alangalanuvchi moddalarni saqlash qoidalarining buzilishi va yong‘in xavfsizligi qoidalarining buzilishi kabi ikkita modda bo‘yicha jinoyat ishi qo‘zg‘atdi. Hozircha portlash sabablari aniqlanmagan.

Ayni paytda, Armanistonning Jam News portal yozishicha, bir yarim yil avval savdo markazida tekshiruv o‘tkazilgan va yong‘in xavfsizligi qoidalarining buzilishi aniqlangan, ular yong‘in kelib chiqquniga qadar ham bartaraf etilmagan.