“Forish” poligonida “ArMI-2022” xalqaro armiya o‘yinlari musobaqalariga start berildi

Markaziy harbiy okrugning “Forish” tog‘ poligonida “ArMI—2022” VIII Xalqaro armiya o‘yinlarining O‘zbekiston mezbonlik qilayotgan “Qurolsoz usta”, “Xavfsiz muhit” va “Dala oshxonasi” musobaqalariga 15-avgust kuni start berildi. Bu haqda Mudofaa vazirligi xabar qildi.

Qayd etilishicha, kechki soat 19:00 da poligon saf maydonida “ArMI—2022” xalqaro armiya o‘yinlarida O‘zbekiston mezbonlik qilayotgan musobaqalarning ochilish marosimi boshlandi.

Unda Mudofaa vazirligi va ishtirokchi davlatlar mas’ullari, senatorlar, davlat va jamoat tashkilotlari vakillari, Mudofaa vazirligi huzuridagi jamoatchilik kengashi a’zolari, faxriylar va yoshlar, jurnalistlar va blogerlar ishtirok etgan.

Mudofaa vazirligi Markaziy harbiy orkestrining ko‘rgazmali defilesi, taniqli badiiy jamoalar va san’atkorlar ijrosidagi katta konsert dasturi hamda turli xalqlar madaniyatini ifoda etuvchi badiiy chiqishlar namoyish qilingan. Qurolli Kuchlar akademiyasi kursantlari qurol bilan ko‘rgazmali chiqishlarni ijro etgan.

Ta’kidlanishicha, O‘zbekiston Mudofaa vazirligi jamoalari bu yil xalqaro armiya o‘yinlarining 20 ta yo‘nalishida ishtirok etmoqda. 34 ta yo‘nalishni qamrab olgan musobaqalarda 37 ta davlatdan 257 ta jamoa o‘zaro bellashishadi.

Eslatib o‘tamiz, 2021-yil xalqaro armiya o‘yinlarida 42 ta davlatning jami 277 ta jamoasi o‘zaro kuch sinashgan bo‘lib, unda O‘zbekiston jamoalari 24 yo‘nalishda ishtirok etgan. Umumiy natijalarga ko‘ra, mamlakat jamoalari 4 ta oltin, 9 ta kumush va 4 ta bronza medallarini qo‘lga kiritgan holda umumjamoa hisobida 2-o‘rinni egallagan. Shuningdek, jami 37 ta rekord natijadan 10 tasini o‘zbekistonlik harbiy xizmatchilar yangilagan.