Avvaliga qamalgani, keyinchalik matbuot kotibidan najot so‘ragani aytilib, rad etilgan Koson tumani hokimi Asrol Boyqarayev sog‘lig‘ini tiklab, davolanish ta’tilidan ishiga qaytdi. Bu haqda hokimlik axborot xizmati xabar berdi.
“Tuman hokimi Asrol Boyqarayev sog‘ligida muammo bo‘lgani uchun iyul oyida ham davolanish ta’tiliga chiqqandi. Kuni kecha hokim sog‘ligini tiklab, yana o‘z vazifasini bajarishga kirishdi”, — deyiladi hokimlik axborotida.
Ijtimoiy tarmoqlarda Asrol Boyqarayev bilan bog‘liq ko‘plab ma’lumotlar tarqalgandi.
2021-yilda uning xizmat avtomobili tuman markazida bir fuqaroni urib yuborgani, oqibatda fuqaro vafot etgani xabar berildi. So‘ngra mazkur YTHga hokimning birinchi o‘rinbosarini olib yuruvchi haydovchi aybdor ekani, YTH sodir bo‘lgan paytda avtomobilda hokim bo‘lmagani ma’lum qilindi. Avvalroq esa Asrol Boyqarayevning qamoqqa olingani yozib chiqildi. Bunga munosabat bildirgan hokimlik axborot xizmati “tasdiqlanmagan, vahima va shov-shuv uchun tarqatilayotgan yolg‘on xabarlarga ishonmang”, dedi. Birozdan so‘ng Telegram’dagi kanallarning birida Koson tumani hokimi Asrol Boyqarayevning matbuot kotibiga o‘zini tez-tez yoritib turishini so‘ragani, oxirgi marotaba uni matbuot kotibi qutqarib qolgani aytilgan xabar tarqaldi. Koson hokimi matbuot kotibi Dilshod Nabiyev esa mazkur xabarni ham rad etdi.
Izoh (0)