O‘zbekiston jamoasi “ArMI-2022” doirasida o‘tkaziladigan “Tank biatloni” musobaqasida ishtirok etadi

Xalqaro armiya o‘yinlari — “ArMI-2022” doirasida o‘tkaziladigan “Tank biatloni” musobaqasiga qur’a tashlash marosimi bo‘lib o‘tdi, deb xabar bermoqda Dunyo axborot agentligi.

Unda delegatsiya a’zolari, qatnashuvchi davlatlar jamoa vakillari hamda ommaviy axborot vositalari xodimlari ishtirok etgan. Qur’a natijalariga ko‘ra, birinchi divizionda qatnashadigan O‘zbekiston Mudofaa vazirligi harbiy xizmatchilaridan iborat jamoa qizil rangli tankda Vyetnam, Venesuela va Qozog‘iston tankchilari bilan ikkinchi yurishda harakatlanadigan bo‘lgan. Shunday qilib, polkovnik Juma Atashev boshchiligidagi jamoaga birinchi divizionda Ozarbayjon, Belarus, Vyetnam, Venesuela, Qozog‘iston, Xitoy, Qirg‘iziston, Mo‘g‘uliston va Rossiya Federatsiyasi davlatlari jamoalari raqiblik qiladi.

“Jamoamiz ‘Forish’ poligonida musobaqaga jiddiy tayyorgarlik ko‘rdi. Yigitlarimizning kayfiyati a’lo darajada. Eng muhimi shu, menimcha. Ekipajlarimizdagi har bir ishtirokchi bir tan-u bir jon bo‘lib, “Men g‘olib!” shiori ostida harakat qilgan holda nasib qilsa, yuqori natijalarni qo‘lga kiritib yurtimizga qaytamiz”, — deydi jamoa murabbiylaridan biri, podpolkovnik Ismoil Navro‘zov.

Eslatib o‘tamiz: Xalqaro armiya o‘yinlarining eng qiziqarli va shiddatli yo‘nalishi hisoblanadigan “Tank biatloni” musobaqasi Rossiyaning Moskva viloyatida joylashgan “Alabino” poligonida bo‘lib o‘tadi.