«Фориш» полигонида «АрМИ-2022» халқаро армия ўйинлари мусобақаларига старт берилди

Марказий ҳарбий округнинг «Фориш» тоғ полигонида «АрМИ—2022» VIII Халқаро армия ўйинларининг Ўзбекистон мезбонлик қилаётган «Қуролсоз уста», «Хавфсиз муҳит» ва «Дала ошхонаси» мусобақаларига 15 август куни старт берилди. Бу ҳақда Мудофаа вазирлиги хабар қилди.

Қайд этилишича, кечки соат 19:00 да полигон саф майдонида «АрМИ—2022» халқаро армия ўйинларида Ўзбекистон мезбонлик қилаётган мусобақаларнинг очилиш маросими бошланди.

Унда Мудофаа вазирлиги ва иштирокчи давлатлар масъуллари, сенаторлар, давлат ва жамоат ташкилотлари вакиллари, Мудофаа вазирлиги ҳузуридаги жамоатчилик кенгаши аъзолари, фахрийлар ва ёшлар, журналистлар ва блогерлар иштирок этган.

Мудофаа вазирлиги Марказий ҳарбий оркестрининг кўргазмали дефилеси, таниқли бадиий жамоалар ва санъаткорлар ижросидаги катта концерт дастури ҳамда турли халқлар маданиятини ифода этувчи бадиий чиқишлар намойиш қилинган. Қуролли Кучлар академияси курсантлари қурол билан кўргазмали чиқишларни ижро этган.

Таъкидланишича, Ўзбекистон Мудофаа вазирлиги жамоалари бу йил халқаро армия ўйинларининг 20 та йўналишида иштирок этмоқда. 34 та йўналишни қамраб олган мусобақаларда 37 та давлатдан 257 та жамоа ўзаро беллашишади.

Эслатиб ўтамиз, 2021 йил халқаро армия ўйинларида 42 та давлатнинг жами 277 та жамоаси ўзаро куч синашган бўлиб, унда Ўзбекистон жамоалари 24 йўналишда иштирок этган. Умумий натижаларга кўра, мамлакат жамоалари 4 та олтин, 9 та кумуш ва 4 та бронза медалларини қўлга киритган ҳолда умумжамоа ҳисобида 2-ўринни эгаллаган. Шунингдек, жами 37 та рекорд натижадан 10 тасини ўзбекистонлик ҳарбий хизматчилар янгилаган.