Sirdaryo viloyati Mirzaobod tumanida uysiz qolgan oila qo‘yxonada yashayotgani haqida xabar tarqaldi. Tuman hokimligi matbuot xizmati holat yuzasidan munosabat bildirdi.
Ma’lum bo‘lishicha, tuman hokimligi oila va xotin-qizlar bo‘limiga 12-avgust kuni fuqaro M.Mullasheva akasi A.Mullashevning 3 nafar voyaga yetmagan farzandi bilan uysiz qolgani sababli uy-joyga muhtojligini bildirib murojaat qilgan. Murojaati ijobiy hal qilinishi yuzasidan huquqiy tushuntirishlar berilgan bo‘lsa-da, 13-avgust kuni norozilik bildirgan videotasvirlarini ijtimoiy tarmoqqa joylashtirgan.
Tuman hokimligi mutasaddilari 13-avgust kuni “Bahoriston” mahallasiga borib, murojaatchining yashash holatini o‘rgangan. O‘rganish davomida fuqaro M.Mullashevaning Ko‘klam ko‘chasida onasidan qolgan uyi bo‘lgani va quyidagilar aniqlangan.
M.Mullasheva 1995-yilda turmush qurgan. Birinchi turmushidan ikki nafar farzandi bor. Birinchi turmush o‘rtog‘i bilan 5-6 yil yashab ajrashgan. Shundan so‘ng Ko‘klam ko‘chasidagi onasining uyiga qaytib kelgan. Onasining vafotidan so‘ng uyni sotib, “Bahoriston” mahallasi Yakkatut ko‘chasidan uy sotib olgan. Undan so‘ng ikkinchi bor turmush qurgan va 2-3 yil birga yashagan. Birinchi turmushidagi 2 nafar farzandini o‘z otasiga qaytarib bergan.
Shundan so‘ng yana turmushga chiqib, 2-3 yil oralig‘ida turmush o‘rtog‘i bilan birga yashagan. Uning turmush o‘rtog‘i V.Mirkomilov M.Mullashevaning Yakkatut ko‘chasidagi uyini sotib ketib qolgan. Shundan so‘ng Mullasheva uysiz qolib, ijarada yashagan. 2017-yil Turkiyaga ishlash uchun ketgan. U yerda 4 yil bo‘lib, 2021-yil sentabr oyida O‘zbekistonga qaytib kelgan.
Hozirda M.Mullasheva turmushga chiqib, Guliston shahrida ijarada yashab kelmoqda. Qaramog‘ida farzandlar mavjud emas. M.Mullasheva videotasvirga tushirgan voyaga yetmagan qizlar akasining farzandlari ekani, akasini uy-joy bilan ta’minlash maqsadida murojaat qilgani aniqlandi.
Ayolning akasi A.Mullashev sog‘lom, ishga yaroqli, 3 nafar voyaga yetmagan farzandi bor ekani ma’lum bo‘ldi. Turmush o‘rtog‘i Rossiyaga ishlash maqsadida borib, turmushga chiqib ketgani aniqlandi. Shuningdek,u qurilishi tugallanmagan turar joyga ega ekani qayd etildi.
U yashash sharoiti mos kelmaydigan noturar joydan voyaga yetmagan farzandlari bilan birgalikda mahalla markazidagi Yakkatut ko‘chasida xonadonga ko‘chirib o‘tkazildi. M.Mullasheva va uning akasi A.Mullashevga hozirda uysiz qolgani sababli imtiyozli subsidiya haqida tushuncha berildi. Ularga doimiy bandligini ta’minlovchi ish o‘rinlari taklif etildi.
Izoh (0)