Farg‘ona viloyatida fuqarolarning mablag‘larini firibgarlik yo‘li bilan qo‘lga kiritgan nodavlat ta’lim muassasalari aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Qayd etilishicha, Bosh prokuratura huzuridagi departamentning Qo‘qon va Farg‘ona shahri bo‘limlari tomonidan Ta’lim sifatini nazorat qilish davlat inspeksiyasining murojaatiga asosan tergovga qadar tekshiruvlar o‘tkazilgan. Unda “M.A.” va “V.I.” nodavlat ta’lim muassasalari rahbarlari va xodimlari fuqarolarni aldab, internet ijtimoiy tarmoqlarida nodavlat ta’lim muassasa kanallarini ochib, ushbu ta’lim maskanlarini bitirgach bakalavr darajasini beruvchi xalqaro diplomga ega bo‘lishlarini aytib, “M.A.” ta’lim muassasasi 174 nafar fuqaroning 1,1 milliard so‘mini, “V.I.” ta’lim muassasasi 171 nafar fuqaroning 1 milliard so‘mini firibgarlik yo‘li bilan qo‘lga kiritgani aniqlangan.
Shuningdek, “V.I.” nodavlat ta’lim muassasasi rahbari N.A. fuqarolardan undirgan mablag‘lari hisobidan “Lada Vesta” rusumli avtotransport vositasini xarid qilgan.
Mazkur holatlar yuzasidan Jinoyat kodeksining 168-moddasi (firibgarlik) hamda 243-moddasi (jinoiy faoliyatdan olingan daromadlarni legallashtirish) bilan jinoyat ishlari qo‘zg‘atilib, tergov harakatlari o‘tkazilmoqda.
Hurmatli ota-onalar va abituriyentlar! Mamlakatimiz hududida mavjud nodavlat oliy ta’lim muassasalariga o‘qishga hujjat topshirish yoki kontrakt to‘lovlarini amalga oshirishdan avval ularning O‘zbekiston Respublikasida tan olinganiga rasmiy axborot kanallari orqali aniqlik kiritishingizni so‘rab qolamiz, — deyiladi xabarda.
Izoh (0)