O‘zbekistonda havo harorati qachon pasayishi ma’lum qilindi

Hafta oxiriga kelib, havo harorati pasayishi kutilmoqda, deb xabar bermoqda “O‘zgidromet”.

Ma’lum qilinishicha, 15—16-avgust kunlari O‘zbekiston hududi bo‘yicha quruq va biroz issiq ob-havo saqlanib turadi. Faqat Farg‘ona vodiysi tog‘li hududlarida 16-avgustda qisqa muddatli yomg‘ir yog‘ishi, momaqaldiroq bo‘lishi mumkin. Kunduzi harorat 36-39  darajagacha isiydi va shu kunlarning o‘rtacha iqlimiy qiymatlaridan yuqori bo‘ladi.

Hafta o‘rtasi chorshanba kunidan respublika hududiga Ural hududlaridan salqin havo kirib kelishi boshlanib, issiq pasayishiga olib keladi. Ish haftasining oxiriga kelib, havo harorati kechalari 16-20 darajagacha, kunduz kunlari 30-33 darajagacha pasayadi. Barcha hududlar bo‘yicha ba’zi joylarda shamol 15-20 metr/sekundgacha kuchayishi, ayrim joylarda chang-to‘zonlar kuzatilishi mumkin.

Ushbu davrda yomg‘ir yog‘ishi kutilmaydi.