“Chiqindilar bilan bog‘liq ishlarni tashkil etish tizimini isloh qilish bo‘yicha birinchi navbatdagi chora-tadbirlar to‘g‘risida”gi prezident farmoni qabul qilindi, deb xabar bermoqda Telegram’dagi “Huquqiy axborot” kanali.
Farmonga ko‘ra, ekologik nazoratning jamoatchi inspektorlariga Davlat ekologiya qo‘mitasi tomonidan yuritiladigan “Yashil makon” va boshqa platformalardan foydalanish imkoniyatini yaratiladi.
Shuningdek, ichki ishlar organlari tayanch punkti profilaktika (katta) inspektorlariga mahallalarda ekologik nazoratni amalga oshirish bo‘yicha quyidagi vazifa va vakolatlarni berish orqali “Ekologik patrul” ishlash tizimini kengaytiriladi:
- mahallalarda ekologiya, atrof-muhitni muhofaza qilish va tabiatdan foydalanishga doir huquqbuzarliklar profilaktikasini amalga oshirish, shuningdek, brakonyerlikka qarshi kurashish;
- ekologiya, atrof-muhitni muhofaza qilish va tabiatdan foydalanishga doir huquqbuzarliklar hamda brakonyerlikka qarshi kurashish bo‘yicha bevosita ma’muriy javobgarlikka tortish va tergovga qadar tekshiruvni amalga oshirish.
Ichki ishlar organlari tayanch punkti profilaktika (katta) inspektorlari, Patrul-post xizmati xodimlari va Milliy gvardiya harbiy xizmatchilari (xodimlari) ekologiya va atrof-muhitni muhofaza qilish sohasidagi huquqbuzarliklar bo‘yicha ma’muriy javobgarlikka tortish choralari ko‘rilishi natijasida jarima sifatida undirilgan mablag‘larning 30 foizi miqdordagi pul mukofoti bilan rag‘batlantiriladi.
Eslatib o‘tamiz, ekologiya, atrof muhitni muhofaza qilish va tabiatdan foydalanish sohasidagi huquqbuzarliklarni “Ekonazorat” axborot tizimi orqali Davlat ekologiya qo‘mitasiga yuborish mumkin. Huquqbuzarlik aks ettirilgan foto va videomateriallarni yuborgan shaxslar pul mukofoti bilan rag‘batlantiriladi.
Mavzuga doir: O‘zbekistonda “Tabiat himoyachisi” ko‘krak nishoni ta’sis etildi
Izoh (0)