Ayrim Telegram kanallarda “Xo‘rlangan kasalxona” sarlavhasi bilan e’lon qilingan videomurojaatda Chiroqchi tumani tibbiyot birlashmasi tug‘uruqqa tayyorlash bo‘limidagi sharoitlar talabga javob bermasligi, joy yetishmasligi sababli bemorlar yerga yotqizilgani aytilgandi. Qashqadaryo viloyati sog‘liqni saqlash boshqarmasi axborot xizmati murojaat yuzasidan ma’lumot berdi.
Ma’lum bo‘lishicha, tug‘uruqqa tayyorlash bo‘limi 20 o‘rinli bo‘lib, hozirgi vaqtda Chiroqchi va Ko‘kdala tumanlari aholisiga xizmat qiladi. Shifoxona binosi 2014-yilda kapital rekonstruksiya qilingan. Oxirgi marotaba 2019-yilda homiylar mablag‘i orqali joriy ta’mirlangan.
Videomurojaatda aks etgan yerda yotgan odamlar bemorlardan xabar olishga kelgan yaqinlari ekani, ular tibbiyot xodimlari ruxsatisiz xonada yotib qolgani aniqlandi. Ayni paytda mazkur bo‘limda 16 nafar bemor yotib davolanmoqda, 4 ta bo‘sh o‘rin mavjud. Murojaatda keltirilgan ovqatlanish, kiyinish, muolaja va boshqa xonalardagi jihozlar, eshik va romlar bilan bog‘liq muammolar bartaraf etilgan.
Bo‘limda mavjud 20 o‘rin uchun yetarli miqdorda yangi to‘shak, yostiq, ko‘rpa va choyshab mavjud. Belgilangan sanitariya me’yorlariga ko‘ra muolaja xonasida bemor yotqizilmaydi hamda to‘shak to‘shalmaydi.
Tuman tibbiyot birlashmasi tasarrufidagi tug‘uruqxona bo‘limida oxirgi 10 kun ichida qo‘shni Ko‘kdala tumanidan kelgan 137 nafar bemor yotib davolangan. Shu sababli tug‘uruqxonaga qo‘shimcha 20 o‘ringa mo‘ljallangan karavotlar va yumshoq jihozlar berilgan.
Izoh (0)