Ekoqo‘mita rahbarining bir vaqtda 4–5 ta mashinadan foydalanishi aytilgan xabarlarga munosabat bildirildi

“Ekoqo‘mita raisiga 4 talab mashina xizmat qilayotgan bir paytda uning chekka hududlardagi xodimlari 1,5 million so‘m oylikka kun ko‘rmoqda” sarlavhali xabar e’lon qilinib, jamoatchilik muhokamasiga sabab bo‘lgandi. Ekologiya va atrof-muhitni muhofaza qilish davlat qo‘mitasi rais Narzullo Oblomurodov atrofida bo‘layotgan vaziyat yuzasidan munosabat bildirdi.

Unda ta’kidlanishicha, qo‘mita rahbariyati xizmat avtomashinalaridan qonunchilik hujjatlarida belgilangan tartib-qoidalarga asosan foydalanib kelmoqda. Qo‘mita raisiga 1 ta Mercedes avtotransport vositasi biriktirilgan. Shuningdek, zarur hollarda xizmat vazifasini o‘tash davomida olis va chekka hududlarga xizmat safari vaqtida yonilg‘i xarajatlarini tejash maqsadida texnik ko‘mak mablag‘lari hisobidan xarid qilingan navbatchi elektromobil ishlatilishi mumkin.

Shu bilan birga, shuni ma’lum qilamizki, joriy yilning o‘tgan davrida qo‘mitaning barcha hududiy bo‘linmalari, shu jumladan, Qoraqalpog‘iston Respublikasi, Buxoro va Navoiy viloyatlarining olis va chekka hududlarida joylashgan muhofaza etiladigan tabiiy hududlarning moddiy-texnik bazasini yaxshilash maqsadida 40 dan ortiq avtotransport vositalari (“Niva”, elektromobil, Damas) xorijiy hamkorlarning texnik ko‘mak mablag‘lari hisobidan xarid qilindi. Ta’kidlash lozimki, ushbu avtotransport vositalari xaridi uchun byudjet mablag‘lari umuman sarf qilinmagan, — deyiladi rasmiy munosabatda.