Айрим Telegram каналларда «Хўрланган касалхона» сарлавҳаси билан эълон қилинган видеомурожаатда Чироқчи тумани тиббиёт бирлашмаси туғуруққа тайёрлаш бўлимидаги шароитлар талабга жавоб бермаслиги, жой етишмаслиги сабабли беморлар ерга ётқизилгани айтилганди. Қашқадарё вилояти соғлиқни сақлаш бошқармаси ахборот хизмати мурожаат юзасидан маълумот берди.
Маълум бўлишича, туғуруққа тайёрлаш бўлими 20 ўринли бўлиб, ҳозирги вақтда Чироқчи ва Кўкдала туманлари аҳолисига хизмат қилади. Шифохона биноси 2014 йилда капитал реконструкция қилинган. Охирги маротаба 2019 йилда ҳомийлар маблағи орқали жорий таъмирланган.
Видеомурожаатда акс этган ерда ётган одамлар беморлардан хабар олишга келган яқинлари экани, улар тиббиёт ходимлари рухсатисиз хонада ётиб қолгани аниқланди. Айни пайтда мазкур бўлимда 16 нафар бемор ётиб даволанмоқда, 4 та бўш ўрин мавжуд. Мурожаатда келтирилган овқатланиш, кийиниш, муолажа ва бошқа хоналардаги жиҳозлар, эшик ва ромлар билан боғлиқ муаммолар бартараф этилган.
Бўлимда мавжуд 20 ўрин учун етарли миқдорда янги тўшак, ёстиқ, кўрпа ва чойшаб мавжуд. Белгиланган санитария меъёрларига кўра муолажа хонасида бемор ётқизилмайди ҳамда тўшак тўшалмайди.
Туман тиббиёт бирлашмаси тасарруфидаги туғуруқхона бўлимида охирги 10 кун ичида қўшни Кўкдала туманидан келган 137 нафар бемор ётиб даволанган. Шу сабабли туғуруқхонага қўшимча 20 ўринга мўлжалланган каравотлар ва юмшоқ жиҳозлар берилган.
Изоҳ (0)