Buxorodagi “O‘zbekneftgaz” korxonasiga qarashli Enter Engineering kompaniyasiga ishga joylashtirish uchun fuqarodan 600 dollar olgan shaxslar ushlandi. Bu haqda “Daryo”ga Milliy gvardiyaning viloyat boshqarmasi axborot xizmati rahbari Murodjon Rahmatullayev xabar berdi.
Kompaniyada ishlovchi A.A. hamda S.G‘. lar fuqaro R.Z.ni korxonaga ishga kirishi uchun bo‘ladigan imtihonlardan o‘tkazib, vakolatli tanishlari orqali ishga joylashtirib qo‘yishni va’da bergan. Va buning evaziga undan 600 dollar talab qilgan. R.Z. esa pora bermay, ushbu korxonaga ishga kirib bo‘lmasligini anglab yetgan va bu haqda huquq-tartibot idoralariga ma’lum qilgan.
Bosh prokuratura huzuridagi Departamentning viloyat boshqarmasi hamda Kogon shahar bo‘limi, IIB hamda Milliy gvardiya Buxoro viloyati bo‘yicha boshqarmasi, Enter Engineering kompaniyasi xavfsizlik xizmati bo‘limi xodimlari hamkorligida R.Z.ning arizasi yuzasidan tadbir o‘tkazilgan.
Joriy yilning 5-avgust kuni taxminan soat 15:50 larda Buxoro-Kogon yo‘li yoqasida fuqaro A.A. o‘zining boshqaruvida bo‘lgan Gentra avtomobilining ichida S.G‘. bilan kelishgan holda R.Z.dan 600 dollarni olgan vaqtida daliliy ashyolar bilan jinoyat ustida ushlangan.
Mazkur holat yuzasidan Departamentning Kogon shahar bo‘limi tomonidan A.A.ga nisbatan Jinoyat kodeksining 168-modda 2-qismi (firibgarlik) bilan jinoyat ishi qo‘zg‘atilgan.
Izoh (0)