Farg‘ona shahridagi savdo do‘konida 25-iyul kuni qarovsiz qoldirilgan uyali telefon apparatini o‘g‘irlagan ayol ushlandi. Bu haqda viloyat ichki ishlar boshqarmasi xabar qildi.
Ma’lum qilinishicha, fuqaro X.A. IIBga murojaat qilgan. Unda o‘g‘li — voyaga yetmagan A.X.ga tegishli, narxi 1,5 million so‘mlik “Samsung A-12” telefoni Frunze mavzesi savdo do‘koni oldidagi suv havzasidagi kiyim almashtirish xonasida qarovsiz qoldirilgani, noma’lum shaxs esa uni o‘g‘irlab, hodisa joyidan yashiringanini bildirgan.
Mazkur holat yuzasidan Farg‘ona shahri IIO FMB huzuridagi tergov bo‘limi tomonidan jinoyat kodeksining 169-moddasi 1-qismi (o‘g‘rilik) bilan jinoyat ishi qo‘zg‘atilgan. Olib borilgan tezkor surishtiruv ishlari davomida ushbu jinoyatni M.M. ismli ayol sodir etgani aniqlanib, tergov harakatlari olib borilmoqda.
Avvalroq Qashqadaryoda xolasining sumkasidan puli va telefonini o‘g‘rilab ketgan 20 yoshli yigit ushlanngani haqida xabar berilgandi.
Izoh (0)