Aslida san’atkorning mavqeyini muxlislar belgilab beradi. Ammo ba’zida san’atkor va muxlislar orasida ham nizoli vaziyatlar bo‘lib turadi. Quyida “Daryo” muxbiri Nargiza Murodova san’atkorlarni jig‘ibiyron bo‘lishga majburlaydigan holatlar haqida so‘z yuritadi.
Kaniza Bo‘stonliqdagi to‘yda nega janjal ko‘targandi?
Hamisha shou-shuvlar markazida bo‘ladigan xonanda Kaniza to‘yxonada muxlisini haqoratlagani aks etgan videosi tarqalgandi. Bu to‘y 2021-yilning noyabr oyida Toshkent viloyati Bo‘stonliq tumanida bo‘lib o‘tgandi. Video ko‘plab muhokamalarga sabab bo‘ldi va internet kuzatuvchilari xonandani tarbiyasizlikda ayblashdi.
— To‘yxonaga yaxshi kayfiyatda borganmiz. Bir erkak cho‘ntagi yo‘q shimimga pul qistirmoqchi bo‘ldi. Tabiiyki, bu menga yoqmadi. Unga e’tibor bermay qo‘shig‘imni aytayotganimda, menga haqorat qilayotganini eshitib qoldim. Chunki u o‘tirgan stol bilan mening turgan yer bir-biriga ancha yaqin edi. Qo‘shiqni tugatgach. Chiroyli ogohlantirish berdim. Ammo u istaganidek so‘kdi. Tarqalgan videoda “o‘zing shunaqasan”, degan gapni ko‘p ishlatganman. Chunki men emas, avval u kurakda turgaydigan gaplar bilan so‘kingandi. Ikki tomonni bilmay turib, xulosa qilish oson. Ammo biz demokratik jamiyatda yashamayapmiz, ayol kishini so‘kish, haqorat qilishga hech kimning haqqi yo‘q, — deydi xonanda Kaniza.
Shohjahon Jo‘rayevni asabiylashtirgan holat
Xonanda Shohjahon Jo‘rayev to‘ylarning birida qo‘lini yelkasiga qo‘yib suratga tushmoqchi bo‘lgan yigitni siltab tashlagani aks etgan video tarqalgandi. Ijodkorning qiyofasidan anglash mumkinki, muxlislarning bunday xatti-harakati xonandaga yoqmaydi.
Bundan tashqari, u Instagram'da uni kuzatadigan negativchilarga ham murojaat yo‘llagandi.
— Instagram'ga o‘zining suratini joylamay, ismini yozmay, profilini berkitib xohlagancha so‘kinib, odamlarga aql o‘rgatadiganlar haqida gapirmoqchiman. Ular shariat va dindan gapirib, o‘zidan ulamoni yasavolib hammaning g‘ashiga tegishni yig‘ishtirishsa bo‘lardi. Juda jonga tegishdi. Shunday insonlarning farzandi bordir, o‘ziga qaytib qolishidan qo‘rqmasmikan?! O‘zingizning ham oxiratingizni o‘ylang. Yoqmayaptimi yo‘qol mening profilimdan, — deb qo‘pol murojaat qilishga majbur bo‘lgan xonanda Shohjahon Jo‘rayev.
Halimaxonim: “Gap ko‘tarolmayman, gaplaring bormi?”
Komik aktrisa Halimaxonim ham ko‘p marta muxlislari bilan tortishib qolgan. U Instagram'dagi jonli muloqot vaqtida kuzatuvchilarining gapi uchun qo‘pol muomala qilgan.
— Hamma o‘zicha aqlli, kelib yuzimga aytishga “duxi” yetmay Instagram'dan yozadi. “Ozishga harakat qilsez bo‘miydimi?”, “Eringiz sizni qanday xotin qilib yuribdi?”, “O‘g‘lingizni ko‘zini ko‘rsatsangiz bo‘lmaydimi?” — xullas mana shunaqa nafsoniyatga tegadigan gaplar. Gap ko‘tarolmayman, gaplaring bormi deyman? Semiz bo‘lsam kimga og‘irligim tushyapti? Hech kim, shunday ekan hamma o‘zini bilsin. Hamma uchun onasi qadrli bo‘lganidek men ham farzandlarim uchun xuddi shundayman. Meni nafaqat hayotda, internetda ham kamsitishga hech kimning haqqi yo‘q. O‘sha odamlar juda aqlli bo‘lsa, o‘zini oilasiga va bolalariga e’tibor bersin! Internetda sher bo‘lib gap chaynarvermaydan, — deydi komik aktrisa Halimaxonim.
Feruza Normatova: “Farosatni ishlataylik”
Aktrisa Feruza Normatova esa ko‘cha-kuyda uni ko‘rib, birga suratga tushishishini so‘rayotgan yigilarga murojaat qilgan.— Ro‘mol o‘rab, begona erkaklar bilan rasmga tushmayman-ku. Ozgina farosatni ishlatish kerak. Shuning uchun ko‘cha-kuyda meni ko‘rib qolsangiz, yonimga “Rasmga tushaylik”, deb kelmanglar, — dedi aktrisa Feruza Normatova.
Alisher Uzoqov tomoshabinga tarsaki tushirgani haqida...
Alisher Uzoqov esa teatrda rol ijro etayotganida madaniyatni bilmagan tamoshabinga tarsaki tortib yuborgan. Bu holatdan nafaqat tomoshabinlar, balki aktyorning hamkasblari ham hayron bo‘lishgan.
— “Diydor” teatr studiyasi kichkinagina, aktyor va tomoshabinlar orasi juda yaqin. Jiddiy spektakl namoyish etilayotganda birinchi qatorda o‘tirgan tomoshabin kulib o‘tiribdi. Unga ogohlantirish berish uchun balandroq ovozda gapirdim. Ammo u kulishda davom etdi. Uning harakatlari yomon ta’sir qilayotgani uchun yoniga borib beixtiyor tarsaki tortib yuborganman. Ammo eng qizig‘i sahna ortida bo‘lgan. Portnyorim Akbarxo‘ja boshqa hamkasblarimizga “Alisher aqldan ozib qolibdi. Old qatorda o‘tirgan tomoshabinni urdi”, debdi. Men esa spektakl yakunlangunga qadar qaltirab, o‘zimni yomon his qilganman, — deydi aktyor Alisher Uzoqov.
Lola Ahmedova nega muxlisini ruhiy kasalliklar shifoxonasiga joylashtirgan?
O‘zbekistonda xizmat ko‘rsatgan artist Lola Ahmedova ashaddiy muxlislaridan birini ruhiy kasalliklar shifoxonasiga yotqizishga majbur bo‘lgan. Buning boisi, muxlis xonanda bilan munosabatlari haqidagi yolg‘on ma’lumotlarni tarqatish bilan shug‘ullangan. U gazeta va televideniyega xonanda haqidagi bo‘htonlarni yozib, agar murojaatiga bee'tibor qarashsa sudlashish bilan tahdid qilgan.
— Bu inson bilan ro‘baro keldim. Suhbatlashdim. O‘zimni ko‘rsa, sen bilan ishim yo‘q, deydi. Lekin biz buning tagiga etganimizda u kishining ruhiy nosog‘lom ekanligini aniqladik. Yoki bu ish kimgadir kerakmikan? Buni vaqt ko‘rsatadi. Bu insondan ruhiy kasalliklar shifoxonasiga joylashtirganimizdan so‘nggina qutuldik. U haqiqatan ham nosog‘lom, noadekvat inson.
U inson mening muxlisim bo‘lganida, tinchimni buzmasdi. U tufayli ancha ovora bo‘ldim, asablarim buzildi. Prokuratura xodimlariga murojaat qilishga to‘g‘ri keldi. U achinishga loyiq. Uning onasi bilan suhbatlashishganida, “O‘g‘lim Lolaning muxlisi, uni yaxshi ko‘radi, men hech narsa qilolmayman’”, degan ekan,— degandi xonanda Jasur Hamroyevga bergan intervyusida.
Yulduz Usmonovani asabiylashtirgan parda mojorosi
Yulduz Usmonova 2022 yilning 12-mart kuni o‘tkazilgan yakkaxon konsertida texnik nosozlik sabab pardaning ko‘tarilmay qolgani va ayrim muxlislar bunga e’tiroz bildirgach, xonanda ularga qo‘pol gapirib yuborgani haqidagi video ko‘plab muhokamalarga sabab bo‘ldi.
— Voqeani bilmay turib, baho berish oson. San’atkorni madaniyatsizlikda ayblashdan avval “Voqea nega bunday tus olgandi, nega xonanda qattiq asabiylashdi?” deb o‘ylab ko‘rish kerak. Jonli ijroda kuylayotgan xonandaga zaldagi notinchlik halal beradi. Chunki butun konsert repertuarini eslab qolish osonmas. Parda ko‘tarilayotganida unga kaftdek taxta tiqilib qolgan. Sahna ishchilaridan biri yugurib saroyning eng yuqori qavatiga chiqqan. Hatto, shoshilib pardani ko‘taraman deb oyog‘ini tutgich kesib yuborgan. Ammo bu holatni tomoshabinlar bilmay, bizdan ranjishdi. Yulduz opangiz ham qattiq asabiylashdi, — deydi xonandaning turmush o‘rtog‘i va konsert prodyuseri Mansur Agaliyev.
Mavzuga doir:
- “Shoirni nima jin urdi bilmayman, birdan o‘zgardi” — Mansur Agaliyev Yulduz Usmonovaning shoir bilan mojorosi qanday yakun topganiga oydinlik kiritdi (video)
- Yulduz Usmonovaning eri shov-shuvli “parda voqeasi” aslida qanday bo‘lgani va konsert xarajatlariga oydinlik kiritdi (video)
- Irqchi, zo‘ravon va qoidabuzar: Gollivudda nomaqbul ishlari uchun qora ro‘yxatga kiritilgan yulduzlar (foto)
- Ashaddiy muxlislari ta’qibiga uchragan mashhurlar (foto)
Izoh (0)