Aktyor Tolib Hojiyev “Sevimli” telekanalining “Mashhurlar” ko‘rsatuviga bergan intervyusida san’atga kirib kelgan ilk yillarida massajchi bo‘lgani, bu orqali qancha ishlab topgani, teatrdagi oylik maoshi, mardikor bozoriga borgani, g‘isht quyib sotgani, o‘pkasining 95 foizi kasallanib tuzalgani haqida gapirib berdi.
Tolib Hojiyev san’atga kirib kelgan ilk yillarida massajchi bo‘lgani va bu orqali qancha mablag‘ ishlagani haqida
“Bir narsani aytmoqchiman, san’atga kirib kelgan yillarim juda og‘ir bo‘lgan. Hammomda massajchi bo‘lganman, yakshanba kunlari borib shu yerda ishlardim. O‘sha paytda bir kishini massaj qilish 10 so‘m edi, men shu narxni 15-20 so‘mga chiqardim, chunki yosh edim, daladan kelganman, qo‘llarim temirdek edi.
Insonlarning tanasida og‘riq nuqtalari bor. Men shularni o‘rganib chiqdim, har bosganimda ovoz chiqarishardi, keyin ta’rifim ketdi, qo‘li yengil ekan deyishgan”, — deydi aktyor.
Aktyor mardikor bozoriga borgani, g‘isht quyib sotgani va teatrdan qancha oylik olgani haqida
“Keyin esimda, dushanba kuni teatrga o‘tib ish boshladim. O‘sha kundan keyin har dushanba ayolim ertalab oltida turg‘izardi. Shu paytlari Hamza teatrining orqasidagi yotoqxonada turardik. Biz uni yotoqxona emas, ijodiy yoshlar uyi derdik. Chunki o‘sha paytda ham g‘ururimiz joyida bo‘lgan.
Keyin mardikor bozoridagi eng og‘ir ish g‘isht quyish edi. Bir kunda mingta g‘isht quyilsa, 25 so‘m berishgan. Men bir kunda 3000 ta g‘isht quyganman. G‘isht quyishdan 75 so‘m topardim, teatrdan esa 82 so‘m maosh olar edim”, — deydi Tolib Hojiyev.
Qattiq kasal bo‘lib qolgan va o‘pkasining 95 foizi kasallanib tuzalgan, hayotdan umidini uzmagan aktyor
“Hayot shirin, unda yashash zavqli. Agar bo‘yningizdan o‘lim changallasa, buni yanada yaxshiroq anglar ekansiz. O‘pkamning 95 foizi zararlandi, bu degani jonni saqlab qolishning iloji yo‘q, degani edi. O‘lim darvozasiga yetishimga sal qolgan edi, shuning uchun bu yashayotgan damlarimiz ham g‘animat. Bu kunlarning qadriga yetib yashash kerak. Bekorchi ishlarni qilmaslik, noto‘g‘ri yo‘llardan yurmaslik kerak. Chunki o‘lim haq. Qon-tomirlarim uzilib, o‘pkamning 95 foizi zararlangandi. Narkozdan keyin ko‘zimni ochdim, tasavvurga sig‘maydi”, — deydi aktyor.
Izoh (0)