Aktyor Egamberdi Rahimov tomoshabinlarga “Tubanlik” filmidagi o‘z qizini yoshi katta mullaga turmushga bergan Qo‘chqorbek roli bilan yaxshi tanish. U aktyorlik faoliyatida ancha kamnamo bo‘lib qoldi. Ayrimlarning fikricha, u san’atdan ketib, tabiblik bilan shug‘ullanayotgan ekan. “Daryo” muxbiri Nargiza Murodova bunga oydinlik kiritdi.
— “Nega filmlarda kamnamosiz?” degan savolni aslida menga emas, rejissorlarga berish kerak. Aktyor ular taklif etsagina, rolni ijro etadi. Keyin avvalgidek filmlar ko‘p emas. Taklif etilganiga borib, ssenariy bilan tanishib ko‘raman. Ssenariy va gonorar summasi ma’qul bo‘lsagina, rozilik beraman. Qolgan payt esa sevimli mashg‘ulotlarim bilan bandman. Ayrimlar o‘ylaganidek, tabiblik bilan shug‘ullanayotganim yo‘q. Ammo tabobatga juda qiziqaman. Sun’iylikdan ko‘ra, Yaratgan ne’matlari bilan sog‘lom bo‘lish tarafdoriman. Bu sohaga qiziqishim avvaldan bo‘lgan. Uning ijodga hech qanday ta’siri yo‘q.
Egamberdi Rahimov qimmat aktyor hisoblanadi. U yuqori gonorar so‘ragani uchun ko‘pchilik ijodkorlar u bilan hamkorlik qilishga cho‘chishadi.
— Men uchun ssenariy va gonorar summasi muhim ahamiyatga ega. Sababi aktyor ham hamma qatori inson. Uning ham ro‘zg‘ori, kam-ko‘sti bor. Agar olgan gonorarimga bozorga kirib, ikkita xalta ro‘zg‘orlik qilolmasam, ijodning qadr-qiymati qoladimi? Uch-to‘rt yil oldin teatrda ishlaydigan yaqin tanishim qo‘ng‘iroq qilib “Rossiyadan bir akamiz kelyapti, hech ishdan bo‘sholmayapman, ikki kun shu inson bilan shahar aylanolasizmi?”, deb iltimos qildi. Rozi bo‘lib, mehmonga yangi Toshkentni ko‘rsatdim. U ijodkorlarga yaratilgan shart-sharoitlarni ko‘rdi, suhbatda bo‘ldi. Ketar chog‘ida “Ijodkorning qadri yo‘q ekan, zavod ishchisi bilan bir xil oylik olarkan”, dedi. Haqiqatan ham ijodkorlarga to‘lanadigan gonorar ancha kam.
Aktyor bir necha yil avval teatrlarda ham faoliyat yuritgan. Ammo qandaydir sabab bilan teatrdan ketishga qaror qilgan. Buning sababini u quyidagicha izohladi. — “Yosh tomoshabinlar” va “Ilhom” teatrlarida ishlaganman. Ammo oyliklarning kamligi bois teatrdagi faoliyatimni yakunlashga majbur bo‘lgandim. Hozir teatrlardagi ahvol qandayligini bilmadim-u, avval havas qilgudek emas edi. Oyliklar kam, sharoit deyarli yo‘q bo‘lgani uchun teatrda ishlash oson emasdi. “Ilhom” teatridagi vaziyat o‘sha vaqtda ham o‘zbek teatrlariga nisbatan ancha yaxshiroq edi. “Yosh tomoshabinlar teatri”da aktyor kiyimidan tortib, rekvizitini topishga ham o‘zi mas’ul edi. “Ilhom”da esa aktyor faqat roli haqida qayg‘urardi. Teatrda ishlash juda qiyin. Shunga yarasha ijodkor ham rag‘batlantirilsa yaxshi bo‘ladi.
Hozirgi kunda ko‘pchilik ustoz aktyorlar ham seriallarda yoki ijtimoiy tarmoqlar uchun olinayotgan roliklarda suratga tushmoqda. Bu borada sizga ham takliflar bo‘ldimi, degan savol aktyorni biroz o‘ylantirib qo‘ydi.
— Taklif qilishadi, pulning ortidan quvmay, ilmning ortidan boradigan yoshga yetdim. Pul berar ekan, ekranda ko‘rinar ekanman, deydigan yoshda emasman. Deyarli televizor ko‘rmayman, chunki ko‘rsam jahlim chiqishini bilaman. Hamma rejissorlarni yomon deyolmayman, avvaldan yaxshi kino va serial olib yurganlar ko‘p. Ammo serial olayotganlarning ko‘pchiligi faqat pul topish dardida shu ishga qo‘l urishyapti. Ular homiy topishni, firmadan firmaga pul o‘tkazishni qoyillatishadi, ammo ijodga kelganda — hammasi yumaloq yostiq bo‘lib ketadi.Ba’zida esa soqolim borasida tortishib qolamiz. Men ikkinchi kursda o‘qiyotganimdan beri soqol o‘stiraman. Umrim mobaynida bir marta davlat tadbiriga taklif etishganida uni olganman. Xullas, kino olinguniga qadar muzokaralar ko‘p bo‘ladi.
Ilmning erta-kechi yo‘q. Inson hamisha ilm olishi, muqaddimamiz va yakunimiz qanday bo‘lishini anglab yetmog‘imiz lozim. Yoshgina bola edim, ikkinchi o‘g‘lim tug‘ilganida kap-katta erkak bo‘lib qolganimni angladim. Hozir esa bolalarimning bolasini ko‘rib, umrimning ancha qismini bosib o‘tganimni anglayman.
Mavzuga doir:
- “Islom dini va chin musulmonlarga qarshiligim yo‘q”. Hilol Nasimov janozasiga kelmaydigan hamkasbi hamda filmlari qahramonlarining prototiplari haqida (video)
- “Tubanlik”dagi Dilroz — aktrisa Ziyoda Xudoyqulova nega kinoni tark etdi? (foto)
- Matyoqub Matchonov davlat ishidagi 3 mln oylik bilan qanday qilib 120 ming dollarlik BMW’da yurgani hamda kinolarda ko‘rinmay qolishining sababi haqida (video)
- “Boshida Jahongir Ahmedovdan ranjidim”. Matyoqub Matchonov “Ilhaq” filmidagi rais rolini ijro qilmoqchi bo‘lgani, ammo shogirdi rolni unga bermagani sababi haqida (video)
Izoh (0)