Dmitriy Medvedev Lugansk xalq respublikasiga tashrif buyurdi va majlis o‘tkazdi

Rossiya Xavfsizlik kengashi raisi o‘rinbosari, mamlakat sobiq prezidenti va bosh vaziri Dmitriy Medvedev o‘z Telegram-kanalida o‘z-o‘zini mustaqil deb e’lon qilgan Lugansk xalq respublikasi (LXR)ga tashrif buyurgani haqida yozdi.

Medvedevning so‘zlariga ko‘ra, u yerda Rossiya prezidenti Vladimir Putinning topshirig‘i bilan DXR va LXR rahbarlari bilan ushbu respublikalarni ta’minlash chora-tadbirlari bo‘yicha majlis o‘tkazgan.

Yig‘ilishda, shuningdek, bosh prokuror Igor Krasnov, prezident ma’muriyati rahbari birinchi o‘rinbosari Sergey Kiriyenko, ichki ishlar vaziri Vladimir Kolokolsev, FXX direktori Aleksandr Bortnikov va Tergov qo‘mitasi rahbari Aleksandr Bastrikin qatnashdi.

“Alohida e’tibor LXDR va DXR qonunchiligini Rossiya qonunchiligi bilan uyg‘unlashtirishga, infratuzilmani qayta tiklashga, kasalxonalarni ta’mirlashga va maktablarni o‘quv yili boshlanishiga tayyorlashga, ijtimoiy muammolarga va fuqarolarni qo‘llab-quvvatlashga qaratildi”, — deyiladi Medvedevning Telegram-kanalida.

Rossiya Xavfsizlik kengashi rahbari o‘rinbosarining LXRning aynan qaysi hududiga borganiga aniqlik kiritilmadi.

Rossiya Ukrainaga bostirib kirganidan keyin Dmitriy Medvedev bir necha marta urushni yoqlab chiqdi, G‘arb va Ukraina siyosatchilarini haqorat qildi hamda Ukraina kelajakda “dunyo xaritasida mavjud bo‘lishi” yuzasidan shubhalar bildirdi.

10-avgust kuni jurnalist va yozuvchi Mixail Zigar Der Spiegel uchun yozgan maqolasida manbalarga tayanib qayd etishicha, Dmitriy Medvedev Ukraina va G‘arbga hujum qilishiga sabab shuki, Putin unga agar o‘zini “kuchli siyosatchi” sifatida ko‘rsatsa va “tarixiy lahzaga muvofiq ish tutsa” yana Rossiya prezidentiga aylanishi mumkinligiga ishora qilgan.