AQSH Davlat departamenti Ukrainadagi Zaporojye atom elektr stansiyasi atrofida qurolsizlantirilgan hudud yaratish tashabbusini ma’qullaydi, deb xabar beradi Meduza.
Biz Rossiyani Ukraina yadroviy inshootlari va yaqinidagi barcha jangovar harakatlarni to‘xtatishga va ular ustidan to‘liq nazoratni Ukrainaga qaytarishga chaqirishda davom etamiz. Shuningdek, Ukrainaning atom elektr stansiyasi atrofida qurolsizlantirilgan hudud yaratish haqidagi chaqiriqlarini qo‘llab-quvvatlaymiz, — deyiladi bayonotda.Shuningdek, Antoniu Guterrish idorasi BMT Zaporojye AESiga o‘z tinchlikparvar kuchlarini joylashtirish niyatida emasligini ma’lum qildi. BMT bosh kotibiga ko‘ra, tomonlarning o‘zlari xavfsizlikni ta’minlashga qodir.
Eslatib o‘tamiz, Rossiya Zaporojye atom elektr stansiyasining o‘qqa tutilishi tufayli 11-avgust kuni BMT Xavfsizlik kengashi majlisini o‘tkazishni talab qildi. Shuningdek, Rossiya MAGATE bosh direktori Rafael Grossi ma’ruzachi sifatida qatnashishini so‘ragan.
Ayni paytda AQSH Rossiyani Zaporojye AES ustidan nazoratni Ukrainaga berishga chaqirmoqda.
“Biz Rossiyani Ukraina yadro obyektlarida yoki ularning yaqinida barcha harbiy operatsiyalarni to‘xtatishga, shuningdek, ushbu obyektlar ustidan to‘liq nazoratni Ukrainaga qaytarishga chaqirishda davom etamiz”, — dedi Oq uy matbuot kotibi Karin Jan-Pyer brifing chog‘ida.
Avvalroq Rossiya hukumati Xalqaro atom energiyasi agentligi (MAGATE) rahbariyatiga delegatsiyaning AESga tashrifini tashkillashtirishda yordam berishga tayyorligini bildirgan edi. BMT bosh kotibi Antoniu Guterrish MAGATE inspektorlariga elektr stansiyasiga kirish imkoniyatini berishga chaqirgan va unga berilgan zarbalarni “o‘z joniga qasd qilish” deb atagan edi. Ayni vaqtda Rossiya TIV BMT kotibiyatini tashrifga to‘sqinlik qilishda ayblamoqda (MAGATE BMT rahbarligi ostida ishlaydi). Rossiya tomoni Zaporojye AESning Ukraina tomonidan davomli o‘qqa tutilishi global texnogen halokatga olib kelishi mumkinligi, stansiya xavf ostida turgani haqida ogohlantirdi.
Izoh (0)