Saakashvilining ahvoli o‘limga yaqin bosqichda turibdi — shifokor

Hibsda saqlanayotgan paytda Tbilisining “Vivamed” klinikasiga yotqizilgan Gruziya sobiq prezidenti Mixail Saakashvili jiddiy kasallikka chalingan. Bu haqda nevrolog Otar Toidze siyosatchini ko‘rib kelganidan keyin ma’lum qildi, deb yozadi Tengrinews.

Toidzening so‘zlariga ko‘ra, yaqin kunlarda Saakashvilini bir guruh shifokorlar borib ko‘rib, sobiq davlat rahbarining salomatligi haqida yakuniy hisobot tuzadi.

“Qariyb bir oydan beri Saakashvilini ko‘rganimiz yo‘q. Hozirgi ahvoli haqida faqat OAVlar va shifokorlar bilan qisqa suhbat orqali xabardormiz. Mixail Saakashvilining huzuriga birinchi hamda so‘nggi tashriflarim o‘rtasida katta farq bor. U gapirishida  qiyinchiliklari bo‘lmagan odam edi, yurishida ham hozirgidek darajada muammolar yo‘q edi. Shuning uchun yaqin kunlarda xolis baho beriladigan yakuniy xulosani yozish uchun uning oldiga boramiz. Bu uchinchi darajali og‘irlikdagi kasallikdir, bu oxirgisidan ikkinchi daraja, ya’ni o‘limga yaqin bosqich”, — dedi nevrolog.

10-avgust kuni Saakashvilini borib ko‘rgan mitropolit Nikoloz aytib berishicha, siyosatchi juda ozib ketgan, klinikada o‘tkazgan vaqti mobaynida 11 kg vazn yo‘qotgan.

Gruziyaning uchinchi prezidenti ayni paytda Tbilisidagi “Vivamed” klinikasida bo‘lib turibdi, u yerga Rustavi qamoqxonasida ikki marta ochlik e’lon qilganidan keyin 12-may kuni o‘tkazilgan edi. Gruziya Jinoiy-ijroiya xizmati ma’lum qilishicha, sobiq prezidentning ahvoli barqaror bo‘lib turibdi va u tibbiy xodimlar nazorati ostitadir.

Saakashvilining o‘g‘li Eduard otasi o‘zini Gruziya siyosatida boshqa ko‘rmayotganini va o‘zining bor e’tiborini Ukrainadagi vaziyatga qaratganini aytdi.