Vengriyadagi nufuzli OTM Qo‘qondagi xalqaro institut bilan hamkorlik qiladi

Farg‘ona viloyati hokimi Xayrulla Bozorov Vengriya Respublikasining O‘zbekistondagi favqulodda va muxtor elchisi Dyula Kovach bilan uchrashdi. Bu haqda “Daryo” muxbiri xabar berdi.

Uchrashuvda Farg‘ona viloyati va Vengriya o‘rtasida ikki tomonlama savdo-iqtisodiy hamkorlik imkoniyatlari, qishloq xo‘jaligi, sanoat, bank-moliya, farmatsevtika, ta’lim yo‘nalishlarida hamkorlik istiqbollari muhokama qilingan.

Vengriya qishloq xo‘jaligi va tabiiy fanlar universiteti bilan yangi tashkil etilayotgan Qo‘qon oziq-ovqat texnologiyasi va muhandisligi xalqaro instituti o‘rtasida hamkorlik o‘rnatish bo‘yicha kelishuvga erishildi.

Shuningdek, Farg‘ona viloyati hokimligi va viloyat ishbilarmonlari delegatsiyasining Vengriyaga tashrifi rejalashtirilayotgani ma’lum qilindi.

Vengr jamiyati va ishbilarmon doiralarida O‘zbekistonga qiziqish katta ekanini qayd etgan elchi Kovach, o‘zining bu tashrifi Farg‘ona viloyati va Vengriya o‘rtasida samarali hamkorlikning tamal toshini qo‘yishiga ishonch bildirgan.

Uchrashuvda Farg‘ona viloyati va Vengriya hududlari o‘rtasida savdo-iqtisodiy va investitsion aloqalarni rivojlantirishga qaratilgan “Yo‘l xaritasi” ishlab chiqishga kelishib olingan.