Фарғона вилояти ҳокими Хайрулла Бозоров Венгрия Республикасининг Ўзбекистондаги фавқулодда ва мухтор элчиси Дюла Ковач билан учрашди. Бу ҳақда «Дарё» мухбири хабар берди.
Учрашувда Фарғона вилояти ва Венгрия ўртасида икки томонлама савдо-иқтисодий ҳамкорлик имкониятлари, қишлоқ хўжалиги, саноат, банк-молия, фармацевтика, таълим йўналишларида ҳамкорлик истиқболлари муҳокама қилинган.
Венгрия қишлоқ хўжалиги ва табиий фанлар университети билан янги ташкил этилаётган Қўқон озиқ-овқат технологияси ва муҳандислиги халқаро институти ўртасида ҳамкорлик ўрнатиш бўйича келишувга эришилди.
Шунингдек, Фарғона вилояти ҳокимлиги ва вилоят ишбилармонлари делегациясининг Венгрияга ташрифи режалаштирилаётгани маълум қилинди.
Венгр жамияти ва ишбилармон доираларида Ўзбекистонга қизиқиш катта эканини қайд этган элчи Ковач, ўзининг бу ташрифи Фарғона вилояти ва Венгрия ўртасида самарали ҳамкорликнинг тамал тошини қўйишига ишонч билдирган.
Учрашувда Фарғона вилояти ва Венгрия ҳудудлари ўртасида савдо-иқтисодий ва инвестицион алоқаларни ривожлантиришга қаратилган «Йўл харитаси» ишлаб чиқишга келишиб олинган.
Изоҳ (0)