O‘zbekiston jamoasi “Harbiy ralli”da ishtirok etish uchun Rossiyaning Tuva respublikasiga yetib bordi. Bu haqda Mudofaa vazirligi xabar qildi.
Mehmonlar orkestr sadolari ostida tantanali ravishda kutib olingan. Mehmonlarga poklik, muqaddaslik va farovonlik ramzi bo‘lgan tuvaliklarga xos shoyi bo‘yinbog‘lar — xadaklar topshirilgan.
Jamoalar harbiy texnika va qurollarni tayyorlab, mashg‘ulotlarni boshlab yuborgan. Hozirda musobaqa o‘tkaziladigan yo‘nalish va bosqichlari uchun yaratilgan sharoitlar bilan tanishmoqda.
Musobaqa davomida harbiy haydovchilardan “KamAZ” va “Ural” texnikalarida turli to‘siqlarga ega 1000 kilometrdan ortiq masofani bosib o‘tish, “Tigr” zirhli avtomobili bortidan “Kalashnikov” pulemyoti orqali o‘t ochish hamda “AK-74” yordamida 100 metr uzoqlikdagi nishonni jamoa bo‘lib ishg‘ol etishi talab etiladi.
“Harbiy ralli” birinchi bor ikki davlat hududida — Rossiya va Mog‘ulistonda 13—19-avgust kunlari bo‘lib o‘tadi.
Izoh (0)