2022-yilning birinchi yarim yilligi yakunlariga ko‘ra, tashqi bozorlarda xizmat ko‘rsatuvchi IT Park rezidentlari soni 203 tani tashkil etdi. Bu haqda IT Park matbuot xizmati xabar berdi.
IT Park rezidentlari tomonidan bajarilgan eksport hajmi o‘tgan yilning mos davriga nisbatan 4,4 baravarga oshdi va 53,2 mln dollarni tashkil etdi.
Shu bilan birga, eksporting 88 foizi AQSH, qolgani esa Buyuk Britaniya, Germaniya, MDH va BAAga to‘g‘ri keladi. 2022-yilning oxiriga qadar eksport hajmi 100 mln dollarga yetishi kutilmoqda.
Bajarilgan xizmatlar hajmi – 2,3 trln so‘mni tashkil etdi. O‘tgan yilning mos davriga nisbatan o‘sish – 235 foiz.
Joriy yilning birinchi yarim yilligida IT Park rezidentlari soni 747 ta kompaniyani tashkil etdi, bu o‘tgan yilning mos davriga nisbatan 155 foizga ko‘p.
747 ta kompaniyadan:
- 589 tasi Toshkent shahrida;
- 157 tasi viloyatlarda;
- 134 ta kompaniya joriy yilning birinchi yarim yilligida tashkil etilgan;
- 94 ta kompaniya IT sohasida ta’lim xizmatlarini ko‘rsatmoqda;
- 107 ta xorijiy kompaniya.
Kompaniyalar faoliyat yo‘nalishlari bo‘yicha quyidagicha taqsimlandi:
- dasturiy ta’minotni ishlab chiqish;
- ma’lumotlarni qayta ishlash;
- biznes jarayonlarini avtomatlashtirish;
- IT-ta’lim hamda axborot xizmatlarini eksport qilish.
Birinchi yarim yillikda 249 ta kompaniyaga IT Park rezidenti maqomi taqdim etildi. Shuningdek, 74 ta kompaniya rezident maqomidan mahrum qilindi, 110 ta kompaniyaga esa rezident maqomi berilishi rad etildi.
Shunday qilib, joriy yilning 2-choragi yakunida rezident kompaniyalarda 12 500 nafar xodim ish bilan ta’minlandi. Bu o‘tgan yilning mos davriga nisbatan qo‘shimcha ish o‘rinlari sonini 167 foizga oshirdi.
Izoh (0)