O‘zbekistonda milliy ijtimoiy tarmoq va messenjer yaratish bo‘yicha tanlov e’lon qilingani haqida xabar berilgan edi.
Tanlov tashkilotchisi — Innovatsion rivojlanish vazirligi O‘zbekistonga bunday dasturlar nima uchun kerak ekanligini gapirib berdi.
O‘zbekistonda yaratilgan ijtimoiy tarmoqlar
“Daryo”ning hisob-kitoblariga ko‘ra, so‘nggi 15 yil ichida O‘zbekistonda 32 ta milliy ijtimoiy tarmoq yaratilgan. 2022-yilga kelib ularning barchasi yopilgan.
2016-yilda Uzinfocom markazi Axborot texnologiyalari va kommunikatsiyalarini rivojlantirish vazirligi ko‘magida “Davra.uz” saytini ishlab chiqdi. Sayt hali ham rasmiy ravishda bor, ammo tarmoq ko‘p yillardan beri ishlamayapti.
Bundan tashqari 2016-yilda “Uchar” deb nomlangan tarmoq ham paydo bo‘lgan va ommalashmagan. 2018-yilda esa UMS’ga tegishli UzChat messenjeri ishga tushirilgan, u ham ommalashmagan.
Muvaffaqiyatli loyihalardan biri “Muloqot” ijtimoiy tarmog‘i edi. U deyarli 7 yil ishlab, 2018-yilda yopilgan.
Nega milliy messenjerlar ommalashmagan?
Innovatsion rivojlanish vazirligiga ko‘ra, yaratilgan milliy messenjerlarning ommalashmaslik sabablari asosan kiberxavfsizlik, ma’lumotlarning ishonchli saqlanishi hamda barqaror ishlash qobiliyati mavjud emasligidir.
Ko‘plab yaratilgan platformalar uy sharoitidagi yoki ofis serverlariga o‘rnatilgan va foydalanuvchilar soni bir necha mingtaga yetganida esa faoliyatida uzilishlar kuzatilgan.
Hozirgi kunda ijtimoiy tarmoqlar yaratishda mana shu omillarga alohida e’tibor berilmoqda, — deyiladi vazirlik xabarida.
Mamlakatda jami 24,1 mln nafar internet foydalanuvchilari mavjud. Ushbu raqamlar yiliga o‘rtacha 1,4 foizga o‘smoqda.
Bundan tashqari aholining 28,5 foiz qismi 18-35 yosh oralig‘ida bo‘lib, ijtimoiy tarmoqlar, jumladan messenjerlardan faol foydalanadi.
“Qadriyatlar va milliy an’analar”
Mamlakatda milliy messenjerlar tashkil qilish uchun mahalliy bozor imkoniyati mavjud.
Bundan tashqari, globallashuv jarayonlarida yoshlarimizning ma’naviy va ma’rifiy salohiyatini ijobiy shakllantirishda milliy brendimiz bilan yaratilgan messenjerlarning o‘rni beqiyos, — deyiladi vazirlik xabarida.
Vazirlik mutaxassislariga ko‘ra, xalqaro tendensiyalar internet foydalanuvchilari orasida ijtimoiy tarmoqlar va messenjerlardan faol foydalanuvchilar soni kun sayin ko‘payib borayotganini ko‘rsatmoqda.
Bunday sharoitda mamlakatimizda ham milliy qadriyatlarimizga mos, jahonning ilg‘or texnologiyalari va tajribalaridan samarali foydalangan holda milliy ijtimoiy tarmoqlar va messenjerlarni yaratish maqsadga muvofiq hisoblanadi, — deyiladi xabarda.
Vazirlikka ko‘ra, O‘zbekistonda milliy messenjer yaratilishi nafaqat qadriyatlar va milliy an’analar nuqtayi nazaridan balki xalqaro maydonda kiberolamning salbiy ta’sirlaridan xalqni himoya qilish, inson uchun eng qimmatli bo‘lgan shaxsiy ma’lumotlarning saqlanishini kafolatlash, Janubiy Koreya, Xitoy, Yaponiya, Rossiya hamda Kanada kabi mamlakatlarning milliy messenjerlardan foydalanish tajribasini inobatga olib amalga oshirilishi zarur.
Kompleks funksiyalarga ega milliy messenjerlar yaratilishi orqali yildan-yilga oshib borayotgan o‘zbek internet foydalanuvchilari kontingenti uchun qulay, foydali va xavfsiz platforma paydo bo‘ladi, — deb hisoblaydi vazirlik vakillari.
Avvalroq O‘zbekistonda milliy ijtimoiy tarmoq yaratishga bo‘lgan 32 ta urinish qanday yakunlangani haqda xabar berilgandi.
Izoh (0)