Telegram asoschisi Pavel Durov Apple hech qanday izohsiz messenjerning yangi versiyasini chiqarishni ikki haftaga kechiktirayotganini aytdi. Bu haqda u o‘z Telegram kanalida ma’lum qildi.
Bizning hafsalani pir qilgan yagona narsa shundaki, biz tez-tez texnologiya monopolistlarining mobil ilovalarni ko‘rib chiqishlari tufayli Telegram’ning yangi versiyalarini chiqara olmay qolamiz. Masalan, odamlarning xabarlar orqali o‘zini ifoda etishida inqilob qiladigan so‘nggi yangilanishimiz ikki hafta davomida kechiktirilmoqda. Apple tomonidan hech qanday sabablar va izohlarsiz, — deb yozdi Durov.
Tadbirkor dunyoning eng ommabop ilovalari o‘ntaligiga kiruvchi Telegram’ga shunday munosabat bo‘ladigan bo‘lsa, kichikroq ilova ishlab chiquvchilari qanday qiyinchiliklarni boshdan kechirayotganini tasavvur qilish mumkinligini aytdi.
Bu shunchaki ruhiy tushkunlik emas: bu dunyodagi yuz minglab mobil ilovalar uchun to‘g‘ridan to‘g‘ri moliyaviy yo‘qotishlarga olib keladi, — dedi u.
Telegram asoschisining ta’kidlashicha, Yevropa Ittifoqi va boshqa mamlakatlardagi tartibga solish organlari allaqachon ilovalar ishlab chiquvchilardan 30 foiz komissiya oladigan Apple va Google’ning ushbu “yomon amaliyotlari”ga e’tibor berishni boshlagan.
Ammo Apple texnologiya sanoatiga yetkazgan iqtisodiy zararni qaytarib bo‘lmaydi, — deya xulosa qildi u.
Durov texnologiya gigantlarining ishini bir necha bor tanqid qilgan. Shunday qilib, avvalroq u ilovalar do‘konlarining ishlab chiqaruvchilardan olinadigan 30 foiz komissiyasi haqida shikoyat qilgan va Apple xizmatlari foydalanuvchilarni kompaniyaning “raqamli qullari”ga aylantirishini, chunki ular tanlash huquqini cheklashini aytgan edi.
Avvalroq Telegram asoschisi Pavel Durov BAA fuqaroligini olgani haqida xabar berilgan edi.
Izoh (0)