O‘zbekistonda oxirgi besh yilda xorijiy kapital ishtirokida faoliyat ko‘rsatayotgan korxonalar soni 2,8 barobarga oshdi. Bu haqda Davlat statistika qo‘mitasi xabar bermoqda.
Ayni paytda O‘zbekistonda 14,5 mingta chet el kompaniyalari mavjud. Bunda:
- qo‘shma korxonalar — 6 267 ta;
- xorijiy korxonalar — 8 279 ta.
Yetakchi o‘rinni 2 705 ta korxonada to‘liq yoki qisman ulushi mavjud bo‘lgan Rossiya egallagan.
Bu O‘zbekistonda xorijiy kapital ishtirokida faoliyat ko‘rsatayotgan korxonalar umumiy sonining 18,6 foiz ulushini tashkil etadi.
Bu borada ikkinchi o‘rinni Turkiya (2 050 ta) egallab turgan bo‘lsa, uchinchi o‘rinda Xitoy (2 036 ta) qayd etilgan.
Shuningdek, O‘zbekiston iqtisodiyotiga o‘z kapitalini kiritayotgan Qozog‘iston (1 182 ta) va Janubiy Koreya (906 ta) davlatlari ham yetakchilar hisoblanadi.
Yil boshidan beri 1 530 ta yangi kompaniyalar tashkil qilingan.
2022-yil yanvar—iyul oylarida yangi tashkil etilgan korxona va tashkilotlar soni 2017-yilning mos davri bilan solishtirilganda 3,7 barobarga oshgan.
Bunga nima sabab bo‘lmoqda?
Birinchi navbatda Rossiya kompaniyalari sonining ko‘payishi.
Bu Ukrainada urush boshlangandan keyin ko‘plab rossiyalik tadbirkorlar Rossiyani tark etish, o‘z bizneslarini boshqa davlatlarga ko‘chirishga qaror qilganliklari bilan izohlanadi.
Turkiyadagi iqtisodiy vaziyat ham yangi kompaniyalar sonini keskin oshishiga sabab bo‘lmoqda.
2021-yilda O‘zbekistonda turk kapitali ishtirokida 407 yangi korxona tashkil qilindi va birinchi o‘rinni egalladi. Ikkinchi o‘rinda Rossiya (356 korxona), uchinchi o‘rinda Xitoy (266) qayd etilgan.
Turkiya iqtisodiyoti so‘nggi yillarda iqtisodiy inqiroz tufayli qiyinchiliklarni boshdan kechirmoqda. Turk tadbirkorlari xalqaro bozorlarga chiqish orqali buni qoplashga harakat qilmoqda.
Yaqinda Turkiyada inflyatsiya deyarli 80 foizgacha ko‘tarildi.
Izoh (0)