2022 йилнинг биринчи ярим йиллиги якунларига кўра, ташқи бозорларда хизмат кўрсатувчи IT Park резидентлари сони 203 тани ташкил этди. Бу ҳақда IT Park матбуот хизмати хабар берди.
IT Park резидентлари томонидан бажарилган экспорт ҳажми ўтган йилнинг мос даврига нисбатан 4,4 бараварга ошди ва 53,2 млн долларни ташкил этди.
Шу билан бирга, экспортинг 88 фоизи АҚШ, қолгани эса Буюк Британия, Германия, МДҲ ва БААга тўғри келади. 2022 йилнинг охирига қадар экспорт ҳажми 100 млн долларга етиши кутилмоқда.
Бажарилган хизматлар ҳажми – 2,3 трлн сўмни ташкил этди. Ўтган йилнинг мос даврига нисбатан ўсиш – 235 фоиз.
Жорий йилнинг биринчи ярим йиллигида IT Park резидентлари сони 747 та компанияни ташкил этди, бу ўтган йилнинг мос даврига нисбатан 155 фоизга кўп.
747 та компаниядан:
- 589 таси Тошкент шаҳрида;
- 157 таси вилоятларда;
- 134 та компания жорий йилнинг биринчи ярим йиллигида ташкил этилган;
- 94 та компания IT соҳасида таълим хизматларини кўрсатмоқда;
- 107 та хорижий компания.
Компаниялар фаолият йўналишлари бўйича қуйидагича тақсимланди:
- дастурий таъминотни ишлаб чиқиш;
- маълумотларни қайта ишлаш;
- бизнес жараёнларини автоматлаштириш;
- IT-таълим ҳамда ахборот хизматларини экспорт қилиш.
Биринчи ярим йилликда 249 та компанияга IT Park резиденти мақоми тақдим этилди. Шунингдек, 74 та компания резидент мақомидан маҳрум қилинди, 110 та компанияга эса резидент мақоми берилиши рад этилди.
Шундай қилиб, жорий йилнинг 2-чораги якунида резидент компанияларда 12 500 нафар ходим иш билан таъминланди. Бу ўтган йилнинг мос даврига нисбатан қўшимча иш ўринлари сонини 167 фоизга оширди.
Изоҳ (0)