Андижонда қонунбузилишига йўл қўйган 2 минг нафардан ортиқ шахс жавобгарликка тортилган

Андижонда 2022 йилнинг ўтган олти ойи давомида қонунбузилишларига йўл қўйган 2025 нафар шахс интизомий жавобгарликка тортилган, яна олти нафар ваколатли шахс билан эса тузилган меҳнат шартномаси бекор қилинган. Бу ҳақда вилоят адлия бошқармаси томонидан ўтказилган матбуот анжуманида маълум қилинди, дея хабар бермоқда «Дарё» мухбири.

Бошқарма бошлиғи Отабек Бозоровнинг таъкидлашича, бошқарма ва унинг қуйи бўлимлари томонидан ўтган олти ой давомида белгиланган вазифалар асосида соҳавий йўналишлар бўйича бир қатор самарали ишлар амалга оширилган.

Жумладан, олти ой давомида бошқарма ва бўлимларга жами 5748 та мурожаат келиб тушган бўлиб, уларнинг 5294 таси ҳал этилишига эришилган.

Қолган мурожаатлар бўйича тегишлигига кўра, бошқа идора ва ташкилотларга юборилган. Соҳалар кесимида таҳлил қилинганда мурожаатларнинг 4072 таси инсон ҳуқуқларини ҳимоя қилиш, 323 таси давлат хизматлари кўрсатиш, 917 таси ҳуқуқни қўллаш амалиёти ҳамда 436 таси бошқа соҳаларга оидлиги аниқланган.

Қаноатлантирилган мурожаатлар асосида турли идораларга 407 та тақдимнома, судларга суммаси 12,8 миллиард сўмдан ортиқ 1411 та даъво ариза ва 68 та маъмурий жавобгарликка тортиш юзасидан таклифлар киритилган.

«Жорий йилнинг бошидан шу кунга қадар жами 678 та ўрганиш ва мониторинглар ўтказилган бўлиб, ўрганишлар давомида аниқланган қонунбузилиш ҳолатларини бартараф этиш юзасидан 3451 та тақдимнома киритилган.

Ушбу тақдимномалар натижасида фуқароларга 5 миллиард 628 миллион сўм миқдоридаги маблағлар қайтарилишига, 194 та ҳужжат ижроси тўхтатилишига ҳамда 3614 та ҳужжат бекор қилинишига эришилган.

Аниқланган қонунбузилиш ҳолатларига йўл қўйган 2025 нафар шахс интизомий жавобгарликка тортилган бўлса, олти нафар ваколатли шахслар билан тузилган меҳнат шартномалари бекор қилинган.

Шунингдек, ходимлар томонидан вилоят бўйича жами 536 та маъмурий ҳуқуқбузарлик ҳолати аниқланиб, 75 та ҳолатда тўғридан-тўғри маъмурий баённома расмийлаштирилган. 461 та ҳолатда ваколатли органларига маъмурий жавобгарликка тортиш юзасидан таклифлар берилган.

Мазкур таклифлар натижасида 551 нафар шахслар маъмурий жавобгарликка тортилган. Бундан ташқари бўлимлар томонидан турли ташкилотларга қонунбузилиш ҳолатларига йўл қўймаслик юзасидан 3123 та огоҳнома киритилган», — дейди Отабек Бозоров.

Аввалроқ Наманганда давлат хизматлари кўрсатишда 6,5 мингдан ортиқ қонунбузилиш ҳолатларига йўл қўйилгани ҳақида хабар берилганди.