Ijtimoiy tarmoqlarda Namangan viloyati Pop tumanida yigit o‘zidan katta erkakni kaltaklagani aytilgan xabar tarqaldi. Holat yuzasidan viloyat ichki ishlar boshqarmasi rasmiy munosabat bildirdi.
Ma’lum bo‘lishicha, 26-iyun kuni soat 19:00 da Pop tumani “Olmazor” MFYda yashovchi 2003-yilda tug‘ilgan fuqaro tumandagi “Iskovut” MFYda joylashgan tuman TRIBning oldida Chust tumani “Shuvar” MFYda yashovchi, 1980-yilda tug‘ilgan fuqaroni hech bir sababsiz jamiyatda yurish-turish qoidalarini qasddan mensimasdan, badanining turli joylariga urib, tan jarohati yetkazgan.
Oqibatda fuqaro tan jarohati olib, tuman markaziy shifoxonasiga murojaat qilgan. Pop tumani STEBning xulosasida jabrlanuvchi badanidagi jarohatlar og‘irlik darajasiga ko‘ra o‘rtacha og‘ir tan jarohatlar toifasiga kirishi ko‘rsatilgan.
Mazkur holat yuzasidan Pop tumanida yashovchi shaxsga nisbatan Jinoyat kodeksining 277-moddasi (bezorilik) 2-qismi “a” bandi bilan jinoyat ishi qo‘zg‘atilib, dastlabki tergov harakatlari o‘tkazilmoqda. Aybdorlarga nisbatan jazo muqarrarligi ta’minlanishi ta’kidlangan.
Izoh (0)