Yaponiya hukumati tarkibida bir qator o‘zgarishlar yuz berdi, deb yozadi “RBK”.
Vazirlar mahkamasi bosh kotibi Xirokadzu Matsuno, tashqi ishlar vaziri Yosimasa Xayasi, moliya vaziri Syuniti Sudzuki, davlat yerlari, transport, infratuzilma va turizm vaziri Tetsuo Sayto va iqtisodiy qayta tiklanish vaziri Daysiro Yamagiva (u, shuningdek, koronavirusga qarshi kurash shtabiga boshliq bo‘ladi va startaplarni ilgari surish bo‘yicha mas’ulga aylanadi) o‘z lavozimlarini saqlab qoldi.
Hukmron partiya siyosiy kengashi raisi, hukumatdagi ikki ayoldan biri Sanae Takaiti iqtisodiy xavfsizlik vaziri lavozimini egalladi, uning o‘rinbosari Yasuxiro Xanasi esa adliya vaziriga aylandi. Takaitining o‘rnini shu paytgacha iqtisodiyot, savdo va sanoat vaziri bo‘lib kelgan Koiti Xagiude egallaydi. Vazirlar mahkamasidagi ikkinchi ayol — Nagaoka Keyko ta’lim, madaniyat, sport, ilm-fan va texnologiyalar vaziriga aylanadi.
Yaponiya Sog‘liqni saqlash vazirligiga uchinchi marta Katsunobu Kato rahbar bo‘ldi. Yasukadzu Xamada mudofaa vaziri Nobuo Kishining o‘rnini egallaydi, u esa, o‘z navbatida, bosh vazirning milliy xavfsizlik bo‘yicha maslahatchisiga aylanadi. Bosh vazir yordamchisi Minoru Terada esa ichki ishlar va kommunikatsiyalar vaziri lavozimini egallaydi. Ayni paytga qadar koronavirusga qarshi kurash choralari uchun javobgar bo‘lib kelgan va ilgari iqtisodiy rivojlanish vaziri lavozimida ishlagan Yasutosi Nisimura iqtisodiyot, savdo va sanoat vaziriga, shuningdek, Rossiya bilan iqtisodiy hamkorlik uchun javobgar vazirga aylanadi.
Liberal-demokratik partiya rahbariyatida bosh vazir o‘rinbosari Taro Aso va partiya bosh kotibi Tosimitsu Motegi o‘z lavozimlarini saqlab qoldi.
Hukumat a’zolari Yaponiya imperatori Naruxito tomonidan ma’qullash marosimidan so‘ng o‘z lavozimlarini egallaydi.
Eslatib o‘tamiz, Yaponiya hukumati bugun, 10-avgust kuni ertalab iste’fo berdi. Bosh vazir Fumio Kisida jamoatchilik ishonchi pasayib ketgani tufayli o‘z vazirlar mahkamasini qaytadan shakllantirmoqchi. Shuningdek, bosh vazir ba’zi hukumat a’zolarining “Birlashuv cherkovi” diniy mazhabi bilan aloqalari yuzasidan ayblovlardan qochishga intilmoqda, ushbu mazhab Yaponiya sobiq bosh vaziri Sindzo Abe o‘ldirilganidan keyin aholi e’tiborini tortdi.
Yaponiya hukumatidagi bo‘lg‘usi o‘zgarishlar haqida o‘tgan haftadayoq ma’lum bo‘lgandi. 6-avgust kuni bu haqda Kisidaning o‘zi e’lon qilgandi.
Ayni vaqtda Asahi Shimbun gazetasi siyosiy jamg‘armalar kirim-chiqimlari haqidagi hisobotga tayangan holda qayd etishicha, yangilangan vazirlar mahkamasining kamida uch a’zosi “Birlashuv cherkovi” bilan bog‘liqdir.
Ushbu sektani joriy yil iyulida Yaponiya sobiq bosh vaziri Sindzo Abeni o‘ldirgan Nara shahrining 42 yoshli fuqarosi Tetsuya Yamagami tanqid qilgan edi. Uning fikricha, siyosatchi ushbu mazhabga aloqador bo‘lgan. Erkakning onasi tashkilotga o‘z pullarini o‘tkazgani tufayli, unga nisbatan alamzada bo‘lgan. Kyodo ma’lumotlariga ko‘ra, ayol “Birlashuv cherkovi”ga qariyb 100 million iyena (720 ming dollar) xayriya qilgan.
Tetsuya Yamagamining tog‘asi aytib berishicha, ayol 1990-yillarda turmush o‘rtog‘i o‘z joniga qasd qilganidan keyin sektaga tushib qolgan. Ayol erining o‘limidan keyin to‘langan sug‘urta pullarini, shuningdek, oilaviy ko‘chmas mulklar sotuvidan tushgan pullarni unga xayriya qilgan. Yamagami esa oilada pul yetishmovchiligi tufayli o‘qishini tashlashga majbur bo‘lgan. Cherkovning o‘zidagilar esa 50 million iyenani qaytarib berganliklarini ma’lum qilishdi, Yamagamining onasi nomidan qilingan xayriyalar haqida hech qanday qaydlar bo‘lmaganini ham qo‘shib qo‘yishdi. Uning tog‘asi tashkilotni javobgarlikdan qochishga urinishda aybladi.
Izoh (0)