AQSH prezidenti Jo Bayden Finlyandiya va Shvetsiyani NATOga qabul qilish haqidagi kelishuvlarni ratifikatsiya qilish to‘g‘risidagi protokollarni imzoladi, deb yozadi “RBK”.
Oq uy matbuot xizmati qayd etishicha, hujjatlarni imzolashdan oldin davlat rahbari Shvetsiya bosh vaziri Magdalena Andersson va Finlyandiya prezidenti Sauli Niinistyo bilan suhbatlashgan.
“Prezident Bayden AQSH bizning umumiy xavfsizligimizga har qanday tahdidlarga nisbatan ogohlikni saqlash, shuningdek, tajovuzlarga yoki tajovuz xavfiga qarshi kurash va uni tiyib turish uchun Finlyandiya va Shvetsiya bilan ish olib borishini tasdiqladi”, — deya ma’lum qildi prezident ma’muriyati uning ikkala mamlakat vakillari bilan telefon suhbati yakunlariga ko‘ra.
AQSH Senati Finlyandiya va Shvetsiyaning NATOga qo‘shilishi haqidagi protokollarni ratifikatsiya qilish to‘g‘risidagi rezolyutsiyani 4-avgust kuni ma’qullagan edi. Mamlakatlarning alyansga qo‘shilishini yoqlab 83 senator ovoz bergan, bir kishi qarshi chiqqan.
Shu tariqa, rezolyutsiya zarur bo‘lgan 67 tadan ortiq ovoz bilan qabul qilindi, AQSH esa qonun chiqaurvchi organlari NATOning kengayishi haqidagi hujjatni ratifikatsiya qilgan 20 dan ortiq mamlakatlar ro‘yxatini to‘ldirdi. Shvetsiya va Finlyandiya NATO blokiga qo‘shilishi uchun alyansga a’zo bo‘lgan 30 ta mamlakatning barchasi tegishli bitimni ratifikatsiya qilishi kerak.
18-may kuni Finlyandiya va Shvetsiya Ukrainadagi jangovar harakatlar avj olgan bir paytda NATOga qo‘shilish uchun ariza bergan. Turkiya Xelsinki va Stokgolmni mamlakatda taqiqlangan Kurdiston Ishchilar partiyasi bilan hamkorlikda ayblab, ularning alyansga qo‘shilishga bir muddat to‘sqinlik qildi.
12-iyul kuni AQSH prezidenti Jo Bayden AQSH Kongressi Senatiga mamlakatlarning NATOga kirishi haqidagi protokollarni ratifikatsiya qilish uchun kiritdi. 19-iyul kuni rezolyutsiya Vakillar palatasi tomonidan ma’qullandi. Rossiya prezidenti Vladimir Putin Finlyandiya va Shvetsiya o‘z hududiga alyansning harbiy infratuzilmasini joylashtirsa, Moskva tegishli javob berishga majbur bo‘lishini aytdi.
Avvalroq Finlyandiya va Shvetsiyaning NATOga qo‘shilishi haqidagi protokollar Polsha, Estoniya, Islandiya, Kanada tomonidan ratifikatsiya qilingan edi.
Izoh (0)