Япония ҳукумати таркибида бир қатор ўзгаришлар юз берди, деб ёзади «РБК».
Вазирлар маҳкамаси бош котиби Хирокадзу Мацуно, ташқи ишлар вазири Ёсимаса Хаяси, молия вазири Сюнити Судзуки, давлат ерлари, транспорт, инфратузилма ва туризм вазири Тецуо Сайто ва иқтисодий қайта тикланиш вазири Дайсиро Ямагива (у, шунингдек, коронавирусга қарши кураш штабига бошлиқ бўлади ва стартапларни илгари суриш бўйича масъулга айланади) ўз лавозимларини сақлаб қолди.
Ҳукмрон партия сиёсий кенгаши раиси, ҳукуматдаги икки аёлдан бири Санаэ Такаити иқтисодий хавфсизлик вазири лавозимини эгаллади, унинг ўринбосари Ясухиро Ханаси эса адлия вазирига айланди. Такаитининг ўрнини шу пайтгача иқтисодиёт, савдо ва саноат вазири бўлиб келган Коити Хагиуде эгаллайди. Вазирлар маҳкамасидаги иккинчи аёл — Нагаока Кейко таълим, маданият, спорт, илм-фан ва технологиялар вазирига айланади.
Япония Соғлиқни сақлаш вазирлигига учинчи марта Кацунобу Като раҳбар бўлди. Ясукадзу Хамада мудофаа вазири Нобуо Кишининг ўрнини эгаллайди, у эса, ўз навбатида, бош вазирнинг миллий хавфсизлик бўйича маслаҳатчисига айланади. Бош вазир ёрдамчиси Минору Терада эса ички ишлар ва коммуникациялар вазири лавозимини эгаллайди. Айни пайтга қадар коронавирусга қарши кураш чоралари учун жавобгар бўлиб келган ва илгари иқтисодий ривожланиш вазири лавозимида ишлаган Ясутоси Нисимура иқтисодиёт, савдо ва саноат вазирига, шунингдек, Россия билан иқтисодий ҳамкорлик учун жавобгар вазирга айланади.
Либерал-демократик партия раҳбариятида бош вазир ўринбосари Таро Асо ва партия бош котиби Тосимицу Мотеги ўз лавозимларини сақлаб қолди.
Ҳукумат аъзолари Япония императори Нарухито томонидан маъқуллаш маросимидан сўнг ўз лавозимларини эгаллайди.
Эслатиб ўтамиз, Япония ҳукумати бугун, 10 август куни эрталаб истеъфо берди. Бош вазир Фумио Кисида жамоатчилик ишончи пасайиб кетгани туфайли ўз вазирлар маҳкамасини қайтадан шакллантирмоқчи. Шунингдек, бош вазир баъзи ҳукумат аъзоларининг «Бирлашув черкови» диний мазҳаби билан алоқалари юзасидан айбловлардан қочишга интилмоқда, ушбу мазҳаб Япония собиқ бош вазири Синдзо Абэ ўлдирилганидан кейин аҳоли эътиборини тортди.
Япония ҳукуматидаги бўлғуси ўзгаришлар ҳақида ўтган ҳафтадаёқ маълум бўлганди. 6 август куни бу ҳақда Кисиданинг ўзи эълон қилганди.
Айни вақтда Asahi Shimbun газетаси сиёсий жамғармалар кирим-чиқимлари ҳақидаги ҳисоботга таянган ҳолда қайд этишича, янгиланган вазирлар маҳкамасининг камида уч аъзоси «Бирлашув черкови» билан боғлиқдир.
Ушбу сектани жорий йил июлида Япония собиқ бош вазири Синдзо Абэни ўлдирган Нара шаҳрининг 42 ёшли фуқароси Тецуя Ямагами танқид қилган эди. Унинг фикрича, сиёсатчи ушбу мазҳабга алоқадор бўлган. Эркакнинг онаси ташкилотга ўз пулларини ўтказгани туфайли, унга нисбатан аламзада бўлган. Kyodo маълумотларига кўра, аёл «Бирлашув черкови»га қарийб 100 миллион иена (720 минг доллар) хайрия қилган.
Тецуя Ямагамининг тоғаси айтиб беришича, аёл 1990 йилларда турмуш ўртоғи ўз жонига қасд қилганидан кейин сектага тушиб қолган. Аёл эрининг ўлимидан кейин тўланган суғурта пулларини, шунингдек, оилавий кўчмас мулклар сотувидан тушган пулларни унга хайрия қилган. Ямагами эса оилада пул етишмовчилиги туфайли ўқишини ташлашга мажбур бўлган. Черковнинг ўзидагилар эса 50 миллион иенани қайтариб берганликларини маълум қилишди, Ямагамининг онаси номидан қилинган хайриялар ҳақида ҳеч қандай қайдлар бўлмаганини ҳам қўшиб қўйишди. Унинг тоғаси ташкилотни жавобгарликдан қочишга уринишда айблади.
Изоҳ (0)