Buxorodagi bug‘doyzorga tashlab ketilgan, keyinchalik onasi topilgan bola 2022-yilning yanvar oyida tug‘ilgani ma’lum bo‘ldi. U ayni paytda Buxoro shahridagi Bolalar uyida tarbiyalanmoqda.
“Biz qizaloqning shaxsi aniqlanmagani uchun dastlab unga Umida deb ism qo‘ygan edik. Huquq-tartibot idoralari tomonidan uni tashlab ketgan onasi topilgach, qizaloqning ismi Muslima ekani ma’lum bo‘ldi. Muslima sog‘lom va o‘z tengdoshlariga nisbatan ancha harakatchan, tetik. Ishtahasi yaxshi. Alohida enaga biriktirganmiz”, — deydi Bolalar uyi rahbari Dilfuza Eshmurodova.
Uning so‘ziga ko‘ra, Muslima boshqa bolalar kabi asta-sekin onasizlikka ko‘nikmoqda.
“Juda ko‘p fuqarolar bu qizaloqni farzandlikka olish istagini bildirmoqda. Lekin tergov harakatlari davom etayotgani bois, qizaloq faqat bizning g‘amxo‘rligimiz va qaramog‘imiz ostida bo‘ladi. Tarbiyachi, enagalarimiz mehribon. Bola ham asta-sekin onasizlikka ko‘nikdi”, — deydi Dilfuza Eshmurodova.
Bildirilishicha, qizaloqning onasi samarqandlik bo‘lib, uning xatti-harakatlari yuzasidan ayni paytda G‘ijduvon tuman ichki ishlar bo‘limi tomonidan tergov harakatlari olib borilmoqda.
“Daryo” muxbirining aniqlik kiritishicha, qizaloqning onasi juda yosh va o‘zi ham yetimlikda ulg‘aygan. Qiyinchilik, sharoitsizlik sabab farzandini tashlab ketgan.
“Bolaning otasini ham topish harakatlari boshlangan. Qizaloqni onasiga qaytarish yoxud davlat qaramog‘ida qoldirish haqida tergov harakatlari yakunlangach bir to‘xtamga kelinadi”, — dedi ichki ishlar xodimi.
Izoh (0)