Xitoy yadro sohasida o‘z-o‘zini mudofaa qilish va yadro qurolini birinchi bo‘lib qo‘llamaslik strategiyasiga amal qiladi. Bu haqda Xitoy Tashqi ishlar vazirligining Qurol-yarog‘ ustidan nazorat departamenti direktori Fu Sun Nyu-Yorkda Yadro qurolini tarqatmaslik haqidagi shartnomaga a’zo mamlakatlar konferensiyasida aytib o‘tdi, deb yozadi “RBK”.
“Xitoy har qanday vaziyatlarda ham hech qachon yadro qurolini birinchi bo‘lib qo‘llamaslik majburiyatini oladi”, — dedi u. Diplomatning qayd etishicha, mamlakatda yadro quroli zaxiralari “milliy xavfsizlikni ta’minlash uchun minimal zaruriy darajada” bo‘lib turibdi. U Pekin bu sohada boshqa davlatlar bilan musobaqalashmasligini va qurollanish poygalarida qatnashmasligini qo‘shib qo‘ydi.
Fu Sun AQSHni Yevropadan o‘z yadroviy qurolini olib ketishga va uni boshqa mintaqalarga joylashtirmaslikka chaqirdi. Uning fikricha, qo‘shma yadroviy missiyalar shartnoma nizomlariga zid bo‘lib, yadroviy nizolar xavfini oshiradi.
Stokgolm Tinchlik muammolarini tadqiq qilish xalqaro instituti hisob-kitoblariga ko‘ra, 2021-yil oxiri holatiga Xitoyning yadroviy arsenali taxminan 350 ta jangovar kallakdan iborat bo‘lgan (Rossiya va AQSHda — 5 mingdan ziyod).
Aprel oyida The Wall Street Journal Xitoy rahbariyati pozitsiyasi bilan tanish bo‘lgan manbalariga tayanib, Pekin Vashingtonni tiyib turish vositalari sifatida yadroviy kuchlarini ko‘paytirishni tezlashtirganini ma’lum qilgandi. AQSH tomonidan Tayvanni qo‘llab-quvvatlash kuchayishi fonida (uni Pekin Xitoyning bir qismi deb hisoblaydi) Xitoy yetakchilari AQSH orol tufayli ziddiyatda yadro qurolini qo‘llamoqchi bo‘lib qolishi mumkin, degan xulosaga kelgan. Shu bilan birga, manbalar qayd etishicha, Pekin yadro qurolidan birinchi bo‘lib foydalanmoqchi emas.
2-avgust kuni Tayvanga AQSH vakillar palatasi spikeri Nensi Pelosi Osiyo turnesi doirasida yetib keldi; tashrif Xitoy rahbariyati tomonidan keskin tanqidga sabab bo‘ldi, uni provokatsiya deb atashdi. Oq uy esa Pelosining tashrifi AQSHning Xitoyga nisbatan siyosatida qandaydir o‘zgarish bo‘lganini anglatmasligiga ishontirdi.
Izoh (0)