Xitoy Tayvan fondlariga qarshi sanksiyalar joriy qildi

Xitoy Xalq Respublikasi Davlat kengashining Tayvan ishlari bo‘yicha boshqarmasi matbuot kotibi Ma Syaoguan Xitoy hukumati Tayvan Demokratiya fondiga hamda Tayvan Xalqaro hamkorlik va taraqqiyot fondiga nisbatan intizomiy choralar ko‘rayotganini ma’lum qildi.

“Xalqaro miqyosda ‘demokratiya’ va ‘hamkorlikni rivojlantirish’ niqobi ostidagi bu tuzilmalar Tayvan mustaqilligini e’lon qilishga qaratilgan separatistik faoliyat bilan shug‘ullanadi”, — dedi Ma Syaoguan.

Uning so‘zlariga ko‘ra, ushbu fondlar “Xitoyga qarshi kuchlarni jalb qilish, materikka hujum qilish va uni obro‘sizlantirish uchun qo‘llaridan kelganini qilmoqda, shuningdek, pullarni Tayvanning “xalqaro makonini” kengaytirish uchun tuzoq sifatida ishlatmoqda.

Xitoy hukumati qaroriga ko‘ra, ushbu fondlarga Xitoy materigidagi tashkilotlar, korxonalar va jismoniy shaxslar bilan hamkorlik qilish taqiqlangan. Bundan tashqari, mazkur fondlarni moliyalashtiruvchi yoki ularga xizmat ko‘rsatuvchi tashkilotlar, korxonalar va jismoniy shaxslarga nisbatan sanksiyalar nazarda tutilgan.