Хитой ядро соҳасида ўз-ўзини мудофаа қилиш ва ядро қуролини биринчи бўлиб қўлламаслик стратегиясига амал қилади. Бу ҳақда Хитой Ташқи ишлар вазирлигининг Қурол-яроғ устидан назорат департаменти директори Фу Цун Нью-Йоркда Ядро қуролини тарқатмаслик ҳақидаги шартномага аъзо мамлакатлар конференциясида айтиб ўтди, деб ёзади «РБК».
«Хитой ҳар қандай вазиятларда ҳам ҳеч қачон ядро қуролини биринчи бўлиб қўлламаслик мажбуриятини олади», — деди у. Дипломатнинг қайд этишича, мамлакатда ядро қуроли захиралари «миллий хавфсизликни таъминлаш учун минимал зарурий даражада» бўлиб турибди. У Пекин бу соҳада бошқа давлатлар билан мусобақалашмаслигини ва қуролланиш пойгаларида қатнашмаслигини қўшиб қўйди.
Фу Цун АҚШни Европадан ўз ядровий қуролини олиб кетишга ва уни бошқа минтақаларга жойлаштирмасликка чақирди. Унинг фикрича, қўшма ядровий миссиялар шартнома низомларига зид бўлиб, ядровий низолар хавфини оширади.
Стокгольм Тинчлик муаммоларини тадқиқ қилиш халқаро институти ҳисоб-китобларига кўра, 2021 йил охири ҳолатига Хитойнинг ядровий арсенали тахминан 350 та жанговар каллакдан иборат бўлган (Россия ва АҚШда — 5 мингдан зиёд).
Апрель ойида The Wall Street Journal Хитой раҳбарияти позицияси билан таниш бўлган манбаларига таяниб, Пекин Вашингтонни тийиб туриш воситалари сифатида ядровий кучларини кўпайтиришни тезлаштирганини маълум қилганди. АҚШ томонидан Тайванни қўллаб-қувватлаш кучайиши фонида (уни Пекин Хитойнинг бир қисми деб ҳисоблайди) Хитой етакчилари АҚШ орол туфайли зиддиятда ядро қуролини қўлламоқчи бўлиб қолиши мумкин, деган хулосага келган. Шу билан бирга, манбалар қайд этишича, Пекин ядро қуролидан биринчи бўлиб фойдаланмоқчи эмас.
2 август куни Тайванга АҚШ вакиллар палатаси спикери Нэнси Пелоси Осиё турнеси доирасида етиб келди; ташриф Хитой раҳбарияти томонидан кескин танқидга сабаб бўлди, уни провокация деб аташди. Оқ уй эса Пелосининг ташрифи АҚШнинг Хитойга нисбатан сиёсатида қандайдир ўзгариш бўлганини англатмаслигига ишонтирди.
Изоҳ (0)