AQSH prezidenti ma’muriyati Vashingtonning rossiyalik biznesmen Viktor Butni amerikaliklar Brittni Grayner va Pol Uilanga ayirboshlash taklifiga javoban Moskva bergan taklifni yuzaki (jiddiy emas) deb hisobladi. Bu haqda Meduza xabar bermoqda.
Brifingda Oq uy matbuot kotibi Karin Jan-Pyer aytib o‘tganidek, Rossiya tomonidan berilgan “javob taklifini biz jiddiy taklif deb qabul qilmaymiz”. Uning so‘zlariga ko‘ra, bu “makkorona” taklifdir. U boshqa tafsilotlarni keltirmadi.
“Biz Brittni Grayner va Pol Uilanni uyga qaytarishni istaymiz. Ular noqonuniy ravishda ushlangan, biz buni ochiq-oydin tushuntirdik. Biz bama’ni taklif berdik. Bu masalada halol muzokaralar o‘tkazishni va uni iloji boricha tezroq amalga oshirishni xohlaymiz”, — dedi u.
Rossiyaning qaysi taklifini Oq uydagilar jiddiy deb qabul qilmagani noma’lum. CNN telekanali iyul oxirida Rossiya AQSHga mahbuslar bilan ayirboshlash dasturiga Federal xavfsizlik xizmati ofitseri deb taxmin etilayotgan Vadim Krasikovni kiritishni taklif etgani haqida xabar bergandi, u Checheniston sobiq dala qo‘mondoni Zelimxan Xangoshvilini o‘ldirganlik uchun Germaniyada umrbod qamoq jazosiga mahkum etilgan edi. CNN manbasiga ko‘ra, AQSH Germaniyaga bu masalada murojaat qilgan, ammo Krasikov bilan ayirboshlash jiddiy ko‘rib chiqilmagan.
Bloomberg ma’lumotlari bo‘yicha, Moskva ikki amerikalik evaziga ikki rossiyalikni olmasa, mahbuslar bilan ayirboshlashdan voz kechishga tayyor. Agentlik manbalariga ko‘ra, Rossiya faqat Graynerni Butga almashtiradi yoki ikki kishini ikki kishiga almashtiradi. Vadim Krasikovdan tashqari, ayirboshlash uchun ehtimoliy nomzod, Bloomberg ma’lumotlari bo‘yicha, rossiyalik biznesmen Vladislav Klyushin bo‘lgan, u AQSH tomonidan o‘nlab million dollarlik insayderlik savdolarida ayblanmoqda.
Rossiya va AQSH amerikalik basketbolchi Brittni Grayner ustidan Rossiyada bo‘lib o‘tayotgan sud fonida mahbuslar bilan ayirboshlashni muhokama qilmoqda. Sportchi narkotiklar kontrabandasida ayblanmoqda, u o‘n yilgacha muddatga ozodlikdan mahrum etilishi mumkin.
AQSH Graynerni, shuningdek, josuslik haqidagi modda bo‘yicha 16 yilga hukm qilingan Pol Uilanni topshirishni so‘ramoqda. CNN yozishicha, AQSH Rossiyaga qurol kontrabandasida ayblanib, 25 yillik muddatni o‘tayotgan biznesmen Viktor Butni qaytarishni taklif qilgan.
29-iyul kuni mahbuslar bilan ayirboshlash ehtimoli Rossiya tashqi ishlar vaziri Sergey Lavrov va AQSH davlat kotibi Entoni Blinken tomonidan ularning Ukrainada urush boshlnganidan buyon telefon orqali birinchi suhbati chog‘ida muhokama qilingan edi.
Izoh (0)