АҚШ президенти маъмурияти Вашингтоннинг россиялик бизнесмен Виктор Бутни америкаликлар Бриттни Грайнер ва Пол Уиланга айирбошлаш таклифига жавобан Москва берган таклифни юзаки (жиддий эмас) деб ҳисоблади. Бу ҳақда Meduza хабар бермоқда.
Брифингда Оқ уй матбуот котиби Карин Жан-Пьер айтиб ўтганидек, Россия томонидан берилган «жавоб таклифини биз жиддий таклиф деб қабул қилмаймиз». Унинг сўзларига кўра, бу «маккорона» таклифдир. У бошқа тафсилотларни келтирмади.
«Биз Бриттни Грайнер ва Пол Уиланни уйга қайтаришни истаймиз. Улар ноқонуний равишда ушланган, биз буни очиқ-ойдин тушунтирдик. Биз бамаъни таклиф бердик. Бу масалада ҳалол музокаралар ўтказишни ва уни иложи борича тезроқ амалга оширишни хоҳлаймиз», — деди у.
Россиянинг қайси таклифини Оқ уйдагилар жиддий деб қабул қилмагани номаълум. CNN телеканали июль охирида Россия АҚШга маҳбуслар билан айирбошлаш дастурига Федерал хавфсизлик хизмати офицери деб тахмин этилаётган Вадим Красиковни киритишни таклиф этгани ҳақида хабар берганди, у Чеченистон собиқ дала қўмондони Зелимхан Хангошвилини ўлдирганлик учун Германияда умрбод қамоқ жазосига маҳкум этилган эди. CNN манбасига кўра, АҚШ Германияга бу масалада мурожаат қилган, аммо Красиков билан айирбошлаш жиддий кўриб чиқилмаган.
Bloomberg маълумотлари бўйича, Москва икки америкалик эвазига икки россияликни олмаса, маҳбуслар билан айирбошлашдан воз кечишга тайёр. Агентлик манбаларига кўра, Россия фақат Грайнерни Бутга алмаштиради ёки икки кишини икки кишига алмаштиради. Вадим Красиковдан ташқари, айирбошлаш учун эҳтимолий номзод, Bloomberg маълумотлари бўйича, россиялик бизнесмен Владислав Клюшин бўлган, у АҚШ томонидан ўнлаб миллион долларлик инсайдерлик савдоларида айбланмоқда.
Россия ва АҚШ америкалик баскетболчи Бриттни Грайнер устидан Россияда бўлиб ўтаётган суд фонида маҳбуслар билан айирбошлашни муҳокама қилмоқда. Спортчи наркотиклар контрабандасида айбланмоқда, у ўн йилгача муддатга озодликдан маҳрум этилиши мумкин.
АҚШ Грайнерни, шунингдек, жосуслик ҳақидаги модда бўйича 16 йилга ҳукм қилинган Пол Уиланни топширишни сўрамоқда. CNN ёзишича, АҚШ Россияга қурол контрабандасида айбланиб, 25 йиллик муддатни ўтаётган бизнесмен Виктор Бутни қайтаришни таклиф қилган.
29 июль куни маҳбуслар билан айирбошлаш эҳтимоли Россия ташқи ишлар вазири Сергей Лавров ва АҚШ давлат котиби Энтони Блинкен томонидан уларнинг Украинада уруш бошлнганидан буён телефон орқали биринчи суҳбати чоғида муҳокама қилинган эди.
Изоҳ (0)