Mars Reconnaissance Orbiter kosmik apparati Yerga Mars yuzasining yangi suratlarini jo‘natdi. Ular NASA saytida e’lon qilingan.
NASA Qizil sayyoraning shimoliy yarimsharidagi Gamboa kraterida hosil bo‘lgan qumtepalar suratlarini chop etdi. Qayd etilishicha, ularga maxsus ishlov berilgan va atrofdan ajratib ko‘rsatish uchun tepaliklar ko‘k rangga bo‘yalgan.
Bundan tashqari, olimlar shu tarzda Mars yuzasining xususiyatlaridagi kontrastga diqqatni qaratmoqchi bo‘lgan — bu tarzda tasvirni qayta ishlash Marsdagi geologik va atmosfera jarayonlarini yaxshiroq tushunish imkonini beradi.
Olimlarning ta’kidlashicha, eng kichik qum tizmalarini bir necha metr masofa ajratib turadi, ammo ular guruh bo‘lib bir-biridan taxminan 10 metr masofada joylashgan katta qum to‘lqinlarini hosil qiladi. Ushbu qum qatlamlari ko‘k rangga bo‘yalgani sababli olimlar turli o‘lchamdagi tepaliklarning o‘ziga xos xususiyatlarni osonroq payqashi mumkin.
Qum tepaliklarining o‘ziga xos xususiyatlari tufayli olimlar ushbu tepaliklar paydo bo‘lgan vaqtda shamol qaysi yo‘nalishda esganini aniqlay oladi.
Izoh (0)