Vashington faqat favqulodda holatlardagina yadro qurolini qo‘llashi mumkin, deya ma’lum qildi AQSH davlat kotibi Entoni Blinken BMTning Nyu-Yorkdagi bosh qarorgohida bo‘lib o‘tgan Yadro qurolini tarqatmaslik to‘g‘risidagi shartnomaga a’zo mamlakatlar konferensiyasida.
“AQSH favqulodda holatlardagina, o‘zining, ittifoqdoshlari va sheriklarining hayotiy muhim manfaatlarini himoya qilish uchun yadro qurolidan foydalanish imkoniyatini ko‘rib chiqqan bo‘lardi”, — dedi Blinken.
Uning qayd etishicha, AQSH strategik yadro kuchlarining vazifasi Amerikaga, shuningdek, uning ittifoqdoshlari va sheriklariga yadroviy hujumlarni tiyib turishdan iborat.
Aprelda AQSH Mudofaa vazirligi Ukrainadagi jangovar harakatlar tufayli yadro qurolidan foydalanish imkoniyatini muhokama qilishni boshlamasligini ma’lum qilgan edi. “Bunday gaplar xavfli va foyda keltirmaydi. Hech kim kimdir g‘alaba qozonishi mumkin bo‘lmagan yadroviy urushni xohlamaydi”, — degan edi o‘shanda Amerika harbiy idorasi rahbari Lloyd Ostin.
Ayni vaqtda Rossiya Xavfsizlik kengashi raisi o‘rinbosari Dmitriy Medvedev Ukrainaga qurol-yarog‘lar yuborilishi va NATOning Rossiya chegaralari yaqinidagi harbiy mashg‘ulotlari Rossiyaning alyans bilan bevosita to‘qnashishi xavfini oshirishi, bunday vaziyat esa “to‘la-to‘kis yadroviy urush” tahdidini yaratishi haqida ogohlantirgan edi.
Uning so‘zlariga izoh sifatida Kreml Ukrainadagi maxsus operatsiyaga aralashishga urinishlarga “eng shiddatli javob” berishga Moskva doim tayyor ekanini qayd etgandi. Prezident matbuot kotibi Dmitriy Peskov esa maxsus operatsiyaning har qanday yakuni yadro quroli qo‘llash uchun sabab bo‘lmasligini ta’kidladi.
Izoh (0)