Ўзбекистонда ўтган 6 ойда темир йўлларда хавфсизликка таҳдид солувчи қанча камчилик аниқлангани маълум қилинди

Ўзбекистонда ўтган олти ойда темир йўлларда юк ва йўловчи ташиш билан боғлиқ 9837 та камчилик аниқланган бўлиб, уларнинг 4452 таси хавфсизликка таҳдид солувчи бўлган. Бу ҳақда АОКАда ўтказилган брифингда «Ўзтемир йўлназорат» инспекцияси ахборот хизмати раҳбари Фирдавс Хайриддинов маълум қилди.

Унинг айтишича, инспекция томонидан 2022 йилнинг 6 ойи давомида жами 107 та корхона ва ташкилотларда назорат тадбирлари ўтказилган. Текшириш натижалари бўйича аниқланган камчиликларни бартараф этиш юзасидан тадбиркорлик субъектларига тақиқловчи чораларни белгиловчи 104 та бажарилиши мажбурий бўлган кўрсатмалар берилган.

Шу вақт давомида жами 304 темир йўллари, 113 та локомотив, 941 та юк ва йўловчи вагони носозлиги ёки фойдаланиш муддати ўтганлиги аниқланиб, фойдаланишдан тўхтатилган.

Амалга оширилган тизимли ишлар натижасида, 2022 йилнинг 6 ойида темир йўл транспортида ҳаракатланиш хавфсизлиги бузилишларининг умумий сони 2021 йилнинг шу даврига нисбатан 20 фоизга камайган бўлиб, бу кўрсаткич 2022 йилда 34 та ҳолатни ташкил этган бўлса, 2021 йилдагидан 8 та ҳолатга камайгани қайд этилган.

Жорий йилнинг дастлабки ярим йиллигида «Ўзбекистон темир йўллари» АЖга қарашли темир йўлларда поездлар ҳаракат хавфсизлиги бузилиши бўйича ўтган йилги кўрсаткич 22 та ҳолат ўзгаришсиз қолган. Мазкур кўрсаткич саноат корхоналари шохобча йўлларида 2022 йилнинг 6 ойи давомида 8 тага камайиб, 12 та ҳолатни ташкил этган.

«Ўзбекистон темир йўллари» АЖ, вазирлик ва идораларга қарашли темир йўлларда йўл қўйилган темир йўл ташишлари хавфсизлиги бузилишларининг таҳлили темир йўлларда ташишлар хавфсизлиги бузилишлари:

• 23 та ҳолатда — ҳаракатдаги таркиб ва техник воситаларнинг техник носозликлари;
• 11 та ҳолатда — инсон омилининг салбий таъсири сабабли юзага келганини кўрсатган.

• 1524,28 километр темир йўл капитал таъмирланган;
• 11 комплект стрелкали ўтказгичлар алмаштирилган;
• 1216 дона вагон капитал таъмирланган;
• 8 дона янги вагон харид қилинган;
• 35 дона локомотив капитал таъмирланган;
• 6465 дона шпал ва 3,598 километр рельс алмаштирилган.