Turkiya Iroq shimolida Kurdiston ishchi partiyasiga qarshi “Changal-qulf” harbiy operatsiyasining birinchi fazasini yakunladi. Bu haqda mamlakat mudofaa vaziri Xulusi Akar Hurriyet’ga bergan intervyusida ma’lum qildi.

Akarning ma’lum qilishicha, Turkiya harbiylari “kerakli joyga yetib borgan, u yerlarni quruqlik va havodan nazorat qiladi, belgilangan nishonlarni egallagan”.

Mudofaa vazirining so‘zlariga ko‘ra, operatsiya o‘tkazilgan hududda “ko‘plab g‘orlar, pana va yashirinadigan joylar hamda shtablar” bor, egallangan nishonlar esa operatsiyaning faqat birinchi qismi, xolos. “Terrorchilar yo‘q qilinmagunga qadar ushbu harakat keyinroq davom ettiriladi”, — deya qo‘shimcha qiladi u.

Turkiya Mudofaa vazirligi 18-aprel kuni Iroq shimoldagi Kurdiston ishchi partiyasiga qarshi yangi harbiy operatsiya boshlaganini e’lon qilgandi. “Changal-qulf” kampaniyasi mamlakat sharqida va Iroq shimolida boshlangan. Jangovar harakatlarda Turkiya Mudofaa vazirligining maxsus va harbiy-havo kuchlari ishtirok etmoqda.

Turkiya tashqi ishlar vaziri Mevlut Chavusho‘g‘lining so‘zlariga ko‘ra, operatsiya mamlakat chegaralarini himoya qilishga qaratilgan. “Biz Iroq hududiy yaxlitligini buzmayapmiz, bunday niyatimiz yo‘q”, — degan u.

Eslatib o‘tamiz, 2021-yilning fevralida Turkiya Ichki ishlar vazirligi Kurdiston ishchi partiyasi jangarilariga qarshi antiterror operatsiyalari davomida 718 nafar gumondor hibsga olgandi. Operatsiyalarga parallel ravishda Turkiya tashqi ishlar vaziri Mevlut Chavusho‘g‘li ayrim mamlakatlarning terrorchilikka qarshi kurashda ikki tomonlama o‘yin qilayotgani va jangarilarning qonli jinoyatlariga ko‘z yumgan holda tarafkashlik qilayotganini qayd etgan edi.