Bayrut portida don omborining shikastlangan qismi qulab tushdi, deb Livan Milliy axborot agentligiga tayanib, “RBK” xabar berdi.
Livan jamoat ishlari vaziri Ali Xamiyaning aytishicha, yana ikkita omborxona istalgan vaqtda qulashi mumkin. Hech qanday portlash yoki zaharli moddalar chiqmagan, vahimaga sabab yo‘q, deya qo‘shimcha qildi u.
Bayrut o‘t o‘chirish bo‘limi ham yana bir qancha omborxonalarning qulashi mumkinligini ma’lum qildi.
Livan Atrof-muhitni muhofaza qilish vazirligi yaqin atrofdagi hududlar aholisi niqob taqishi kerakligi haqida tavsiyalarni e’lon qildi, chunki tuzilmalar qulagan paytda ko‘tarilgan chang bilan birga chirigan dondagi zamburug‘lar havoga tarqalishi mumkin. Voqea joyidagi chang tarkibida asbest yoki boshqa zaharli moddalar bo‘lishi mumkin, deb taxmin qilishga asos yo‘q, deyiladi xabarda. Rasmiylar derazalarni 24 soat davomida mahkam yopiq holda qoldirishni tavsiya qilmoqda.
Oxirgi ikki hafta davomida jazirama ob-havo sabab Bayrut portidagi ulkan siloslarda (ko‘p miqdorda quyma yoki suyuq materiallarni saqlash uchun idish) 800 tonna g‘alla yonib ketdi, deb xabar beradi Al Arabiya telekanali. O‘t o‘chiruvchilar siloslar saqlanadigan inshootlarning qulab tushishidan qo‘rqib, yong‘inni o‘chirmagan.
Siloslar 2020-yil avgust oyida Bayrut portida kuchli portlash sodir bo‘lganida shikastlangan edi. O‘shanda ammiakli selitra moddasining portlab ketishi oqibatida 200 dan ortiq odam halok bo‘lgan, 7 mingga yaqin kishi jarohat olgan edi. Atrofdagi turar-joy va ofis binolariga jiddiy zarar yetgan.
Izoh (0)