“Rosnano” kompaniyasining sobiq rahbari va Rossiya prezidentining sobiq maxsus vakili Anatoliy Chubays Giyen-Barre sindromi bilan reanimatsiyaga yotqizildi. Bu haqda rossiyalik teleboshlovchi Kseniya Sobchak o‘zining Telegram-kanalida ma’lum qildi.
“Men Giyen-Barre sindromi tashxisi bilan Yevropa klinikalaridan biriga yotqizildim. Ahvolim o‘rtacha og‘ir, barqaror”, — degan Chubays Sobchakka bergan izohida.
Chubaysning rafiqasi uning ahvoli beqaror ekanini aytdi. “Ahvoli yomonlashdi, qo‘l-oyoqlari to‘satdan qotib qolishni boshladi”, — dedi Avdotya Smirnova.
23-mart kuni Chubays Rossiya prezidentining maxsus vakili lavozimini tark etib, mamlakatdan chiqib ketgani ma’lum bo‘lgan edi, o‘sha kuni uni Istanbulda ko‘rishgan. Xabarlarga ko‘ra, Chubays Turkiyadan Yevropaga uchib ketgan va Italiyada yashayotgan bo‘lishi mumkin.
Jahon sog‘liqni saqlash tashkiloti (JSST) veb-saytidagi ma’lumotlarga ko‘ra, Giyen-Barre sindromi ko‘pincha bakterial yoki virusli infeksiyadan keyin yuzaga keladi; emlash yoki jarrohlik uning rivojlanishiga turtki bo‘lib xizmat qilishi mumkin. Sindromlar odatda bir necha hafta davom etadi va bemorlarning aksariyati uncha uzoq bo‘lmagan muddatda og‘ir nevrologik asoratlarsiz tuzaladi.
Izoh (0)