Ijtimoiy tarmoqlarda O‘zbekistonga kelgan Tolibon vakillarining masjidlardagi namozxonlar bilan uchrashuvi salbiy qabul qilinyapti. Bu haqda siyosatshunos Kamoliddin Rabbimov Telegram’dagi kanalida post yozdi va vaziyatga munosabat bildirdi.
Kamoliddin Rabbimovning yozishicha, bugun Tolibonda O‘zbekiston to‘g‘risida ijobiy ta’surot shakllantirish muhim ahamiyatga ega.
“Ijtimoiy tarmoqlarda O‘zbekistonga kelgan Tolibon vakillarining masjidlardagi namozxonlar bilan uchrashuvi salbiy qabul, jiddiy tanqid qilinayapti. Tolibonni samimiyligiga shubhalar bo‘lishi tabiiy. Jumladan, bu harakat siyosatda va harbiy jarayonda opponent tarafni agar zarurat bo‘lsa, aldash mumkin va kerak deb hisoblaydi.
Lekin bugun O‘zbekiston oldida boshqa vazifa turibdi: Tolibonni o‘zimizning davlatimizga nisbatan dushman sifatida ko‘rish va ko‘rsatish emas, aksincha, mamlakatimiz to‘g‘risida ijobiy ta’surot shakllantirish, kuchaytirish kerak.
Tolibon – mafkuraviy harakat. O‘zbekistonning mutlaq aksariyat aholisi, musulmonlar. O‘zbekiston afg‘onistonliklar, pokistonliklar, eronliklar, turklar va arablar ko‘z o‘ngida yuqori ijobiy obrazga ega bo‘lishi kerak.
Jumladan, toliblar O‘zbekistonni nomiga emas, haqiqatda musulmon mamlakati sifatida ko‘rishi, ishonishi, hurmat qilishi lozim. Buning uchun, kerak bo‘lsa, O‘zbekiston va uning aholisidagi islomiy qadriyatlar haqida 5-10 ta chiroyli videofilmlar olib, afg‘onistonliklar uchun qulay tillarga tarjima qilib, YouTube’ga joylab qo‘yish kerak.
Qo‘shnilar tanlanmaydi. Ularning biz haqimizdagi tasavvurlari, urush va tinchlik uchun, hamkorlik yoki sovuq aloqalar uchun asos hisoblanadi” – deb yozgan siyosatshunos.
Avvalroq Kamoliddin Rabbimov “Tolibon” Afg‘onistondan O‘zbekistonga snaryad otganlarni qo‘lga olib, jazolashini bildirgani yaxshi yangilik ekanini aytgandi.
“Yaqinda toliblar Toshkentga kelib, muzokalalar o‘tkazib, qaytishi bilan Afg‘oniston tomonidan O‘zbekiston hududiga beshta snaryadsiz raketalar otilgandi. Men ‘toliblar muzokaralardan norozi bo‘lib kettimikin”, deb xayol qilgan edim.
Birinchidan, raketalar toliblarni qaytishi bilanoq otilgandi. Ikkinchidan, raketalar snaryadsiz bo‘lgani “bu shunchaki signal, ichida bombasi bo‘lsa bormi”, degandek mujda berardi...
Lekin toliblar “biz aybdorlarni topamiz va qattiq jazolaymiz” deyishi, vaziyatni yumshatgandi. Bugun esa toliblar “hujumlarni uyushtirgan guruh vakillarini” qo‘lgan olganini, jazolashini bildiribdi. Bu yaxshi yangilik.
Bu bilan “Tolibon” harakati “biz bunday fikrlamaymiz, biz bunday qilmaymiz – biz mas’uliyatli qo‘shni bo‘lish niyatidamiz’, demoqda”, – deb yozgandi u.
Mavzuga doir:
Izoh (0)