Toshkentda Matiz va yuk mashinasi to‘qnashuvi oqibatida bir kishi vafot etdi

Toshkent shahri Bektemir tumanida Matiz va yuk mashinasi ishtirokida yo‘l-transport hodisasi sodir bo‘ldi.

2022-yilning 29-iyul kuni soat taxminan 13:00 larda Bektemir tumani, Istiqlol ko‘chasida, haydovchi 2002-yilda tug‘ilgan Sh.X. Matiz rusumli avtomashinasini boshqarib ketayotib, haydovchi 1992-yilda tug‘ilgan, D.D. boshqaruvidagi Howo rusumli yuk avtomashinasi bilan to‘qnashuv sodir etgan.

Dastlabki ma’lumotlarga ko‘ra, Matiz haydovchisi belgilangan tezlikni me’yoridan oshirib, rul boshqaruvini yo‘qotgani sababli qarama–qarshi yo‘nalishga chiqib ketib o‘z yo‘nalishida harakatlanib kelayotgan Howo rusumli yuk avtomashinasi bilan to‘qnashgan.

YTH oqibatida Matiz avtomashinasi haydovchisi olgan tan jarohatlari oqibatida voqea joyida vafot etgan.

Mazkur holat yuzasidan, Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.